Ձեր վստահելի աղբյուրը

Կառավարությունում հրավիրվել է խորհրդակցություն կորոնավիրուսի հետ կապված ընթացիկ իրավիճակը գնահատելու համար։ Այն դեռ շարունակվում է։

Այսօր  մանկապարտեզները, դպրոցները, բուհերը չեն աշխատի։ Ինչպես երեկ հայտարարեց վարչապետ  Նիկոլ Փաշինյանը՝ խորհրդակցությունից հետո կհայտնեն հետագա անելիքների մասին։ Նշենք՝ երեկ դեռ ՀՀ վարչապետը մարզերում հանրահավաքներ էր անցկացնում, միայն երեկոյան, երբ պարզ դարձավ, որ երկրում կան կորոնավիրուսի նոր՝ արդեն տեղում վարակված դեպքեր, որոշեց վերադառնալ արձակուրդից։

Հիշեցնենք, որ այս պահին կորոնավիրուսը հաստատվել է 6 մարդու մոտ։ Երեկ հիվանդությունը հաստատվել է Իտալիայից վերջերս եկած Էջմիածինցի կնոջ ամուսնու և նրա մորաքրոջ որդու մոտ, նրանք երեքն էլ նույն քաղաքի բնակիչներ են։ Կնոջ մոտ հիվանդության հետևանքով թոքաբորբ է առաջացել։

Վերջին երկու հիվանդների մոտ դիտվել էր ջերմության բարձրացում, ինչի կապակցությամբ վերջիններս թեստավորվել են, որի արդյունքում հիվանդությունը հաստատվել է:

Մինչ այդ հրապարակված տվյալներով հանրապետությունում իրականացվել էր  262 հետազոտություն` 4-ը դրական արդյունքով: Բոլոր պացիենտները հոսպիտալացված են ինֆեկցիոն հիվանդանոցում:

Երեկ հրապարակված վերջին տվյալներով մեկուսացված է 57 անձ, նրանք շփում են ունեցել հիվանդների հետ։ Նրանք նույնպես կարանտինային պայմաններում կպահվեն մոտակա 14 օրերին:

Ավելի վաղ հայտարարվել էր, որ հիվանդության ախտորոշումն ու բուժումն իրականացվելու է անվճար։

Հայաստանում կորոնավիրուսի տարածումը կանխարգելող աշխատանքները համակարգող հանձնաժողովի երեկվա  նիստում որոշվել է, որ կիրակի՝ մարտի 15-ին Իտալիայից Հայաստան վերադարձած քաղաքացիները կենթարկվեն 14-օրյա կարանտինային ռեժիմի:

Շեշտենք՝ մինչ այդ նրանք զննվել ու տուն էին ուղարկել։ Այդպես էր և առաջին հիվանդի ժամանակ, որ ժամանել էր Իրանից, և՝ դրանից շաբաթներ հետո Իտալիայից ժամանածների հետ։ 

Առողջապահության նախարարությունն ավելի վաղ Իտալիայից վերադարձածներին ընդամենը հորդորել էր ինքնամեկուսանալ՝ հոգ չտանելով մեկուսացման պայմանների ապահովման, մեկուսացողի ընտանիքի անդամների հետ  կապված  խնդիրների, մեկուսացման վերահսկման հարցերին։

Այնինչ այժմ առողջապահության նախարարությանը հանձնարարվել է Արդարադատության նախարարության հետ միասին առաջարկել տարբերակներ տնային ինքնամեկուսացման ռեժիմը խախտողների նկատմամբ պատասխանատվություն կիրառելու վերաբերյալ։

Նշենք, որ հայաստանյան հանրությունը, որ օրինակ վերցնելով կառավարությունից, մատների արանքով էր նայում վարակի մուտքին Հայաստան, այժմ մեղադրում է  առողջապահության նախարարին՝ մեկուսացումը չապահովելու ու վարակը տարածվելու մեջ։

Հայաստան ժամանող բոլոր քաղաքացիները, անկախ ուղղությունից, բոլոր ուղևորներն ինքնաթիռում կամ վայրէջքից հետո պարտադիր կերպով  լրացնում են հասցեական քարտեր: Դա պարտադիր պահանջ է՝ ինքնաթիռում են լրացնում: Ինչպես նշվեց կառավարության երեկվա նիստում, երեկ  ժամը 9:00-ի դրությամբ, 6300 հասցեական քարտ է լրացվել:

Սա առայժմ այն քայլն էր, որ ձեռնարկվում էր օդանավակայանում՝ Հայաստան եկողների հետ կապված։ Զննումը, թեպետ հավատացնում են, որ բարձր մակարդակի է, չէր երևան հանել մինչ այժմ վարակը ոչ մեկի մոտ։

Ինչևէ՝ աշխարհում Նոր կորոնավիրուսով (COVID-19) պայմանավորված իրավիճակից ելնելով` նախարարությունը հորդորում է.

-Խուսափել ճանապարհորդելուց հետևյալ երկրներ` Իտալիա, Ֆրանսիա, Գերմանիա, Իսպանիա, Ճապոնիա, Չինաստան, Իրան, Հարավային Կորեա:
-Հայաստանից դուրս գործուղումներ պլանավորելիս` խուսափել տվյալ երկրներ մեկնելուց, ինչպես նաև գործուղումներ մեկնելիս անել դա միայն խիստ անհրաժեշտության դեպքում:
-Նշված երկրներից վերադարձած քաղաքացիներին` 14 օր խուսափել շփումներից և ինքնամեկուսանալ:
-Գործատուներին` ապահովել նշված երկրներից վերադարձած աշխատողների հեռահար աշխատանքը տնից:
-Խուսափել Հայաստանում միջազգային միջոցառումներ կազմակերպելուց` նշված երկրներից ժամանած անձանց մասնակցությամբ:
-Եթե վերջին 14 օրերին վերադարձել եք Հայաստան և ունեք ախտանշաններ` ջերմություն, հազ և դժվարացած շնչառություն, ապա զանգահարեք շուրջօրյա գործող «Օպերատիվ զանգերի կենտրոն»` 060 83 83 00 կամ ԱՆ «թեժ գիծ»` 8003 հեռախոսահամարներով:

Նաև՝ 
-Խուսափե'լ շնչառական վարակներով հիվանդների հետ շփումից, անհնարինության դեպքում` օգտագործե'լ անհատական պաշտպանիչ միջոցներ (դիմակներ),
-Հաճախակի լվանալ ձեռքերը` առնվազն 20 վայրկյան տևողությամբ, հատկապես սնունդ ընդունելուց առաջ,
-Գրիպանման երևույթների առկայության դեպքում, չզբաղվել ինքնաբուժմամբ, դիմե'լ բժշկի: