Ձեր վստահելի աղբյուրը

Ֆրանսիայում երկուշաբթի օրվանից բոլոր կրթական հաստատությունները կփակվեն, իսկ մարտի 15-ին և 22-ին նախատեսված քաղաքային ընտրությունները տեղի կունենան՝ չնայած կորոնավիրուսի տարածմանը: Այս մասին նախօրեին հայտարարեց Ֆրանսիայի նախագահ Էմանուել Մակրոնը: Այս մասին գրում է euronews-ը։

Միևնույն ժամանակ, նա հորդորել է 70 տարեկանից բարձր մարդկանց, ինչպես նաև լուրջ հիվանդություններով տառապող մարդկանց՝ լինել չափազանց զգույշ, որքան հնարավոր է ձեռնպահ մնալ շփումներից և հնարավորության սահմաններում մնալ տանը:

«Մենք միայն այս համաճարակի սկզբում ենք, և ամբողջ Եվրոպայում այն արագանում է,  ուժեղանում է: Այս առումով մեր առողջությունը բացարձակ առաջնահերթություն է մեր ազգի համար»,-ասել է Էմանուել Մակրոնը։

Մակրոնը նաև կոչ է արել ոչ թե «ազգայնացնել» վարակը, այլ համատեղել ջանքերը դրա դեմ պայքարելու և խուճապի չտրվելու համար:

«Այս վիրուսն անձնագիր չունի: Մենք պետք է համատեղենք ուժերը, համակարգենք մեր պատասխանը և համագործակցենք: Ֆրանսիան ջանքեր է գործադրում, բայց համաեվրոպական համակարգումն անհրաժեշտ է, և ես դրան կհետևեմ»,-ասել է Մակրոնը։

Վերջին տվյալներով, Ֆրանսիայում COVID-19- ից մահացել է 61 մարդ, բոլոր տարիքով են եղել: Վարակվածների թիվը մոտենում է 3 հազարի: