Ձեր վստահելի աղբյուրը

Կառավարության արտահերթ նիստում  արտակարգ դրություն սահմանելու մասին որոշման նախագծի շուրջ քննարկման ժամանակ ԱԳ նախարար Զոհրաբ Մնացականյանն առաջարկեց սահմանափակումներ մտցնել բոլոր օտարերկրացիների մուտքի համար։ Նախարարի առաջարկին դեմ արտահատվեցին փոխվարչապետներ Տիգրան Ավինյանը, Մհեր Գրիգորյանը, առողջապահության նախարար Արսեն Թորոսյանը։

ԱԳ նախարարն ասաց, որ իրենց մոտեցումը հետևյալն է, ՀՀ տարածք անցակետերով թույլ տալ միայն մուտք գործել ՀՀ քաղաքացիներին, նրանց ընտանիքների՝ օտար երկրների կամ ՀՀ քաղաքացիություն ունեցող անդամներին, օտարերկրյա դիվանագիտական անձնագրեր ունեցող անձանց՝ ծառայողական նպատակներով, կանոնավոր փոխադրումներ իրականացնողներին, ինչպես նաև վարչապետի կամ պարետի որոշմամբ այլ անձանց։

«Սա ավելի է պարզեցնում ու բացատրելի դարձնում, թե ով կարող է գնալ, ով կարող է գալ։ Չստեղծենք իրավիճակ, երբ անընդհատ փոխելու ենք երկրների ցանկը, ստեղծելու ենք խառնաշփոթ թե նախարարության, թե սահմանապահների համար, կառավարելը դառնալու է շատ դժվար»,- ասաց Մնացականյանը։

Տիգրան Ավինյանն ասաց՝  այդպիսի ռեժիմ սահմանել են Իրանի հետ հետ, երբ թույլ են տվել ՀՀ քաղաքացիների, նրանց ընտանիքի անդամների, դիվանագիտական անձնագրեր ունեցողների մուտքը, ինչպես նաև Հայաստանում գտնվող իրանցիների վերադարձը հայրենիք։

Առողջապահության նախարար Արսեն Թորոսյանը նկատեց, Մնացականյանի առաջարկը վերաբերում է ՀՀ քաղաքացիների ու օտարերկրացիների մուտքի և ելքի տոտալ արգելք բոլոր ուղղություններով։

«Կառավարելիության որևէ խնդիր չեմ տեսնում»,- ասաց նախարար Թորոսյանը։

Նա նշեց, որ տոտալ արգելքը թույլ չի տա ճկուն լինել, քանի դեռ նոր կարգավորում չի եղել, հին կարգավորումներն ուժի մեջ են։

Զոհրաբ Մնացականյանն ասաց՝ 118 երկրների հետ ունեն լիբերալ ռեժիմ, այդ երկրների քաղաքացիները կարող են գալ Հայաստան, հետո գնալու հետ կապված խնդիրներ առաջանան։

Ավինյանն էլ նշեց, որ այդ մոտեցման հետ չի կարող համաձայնել, քանի որ ինքնաթիռներով բացի բեռնափոխադրումներից ուղևորափոխադրումներ են իրականացվում։

«Չեմ կարծում, որ պետք է կտրականապես նման քայլերի գնանք»,- ասաց Ավինյանը։

Փոխվարչապետ Մհեր Գրիգորյանն էլ ընդդիմացավ Մնացականյանին՝ նշելով, որ այդպիսով կկտրվենք աշխարհից բառի բուն իմաստով, ոչ մի ավիաընկերություն չի թռնի դեպի Հայաստան, ինչի հետևանքով կարող են Հայաստան վերադառնալու հնարավորությունից զրկվել նաև ՀՀ քաղաքացիները։

Թորոսյանն ասաց՝ ուրախ կլիներ, եթե «նման ճոխություն» թույլ տալու հնարավորություն ունենային, բայց այս դեպքում խնդիր կառաջանա նաև բժշկական ապրանքների ներմուծման հետ կապված։

«Լավ համաձայնեցինք այս առաջարկին, վաղը Չինաստանից մեր պատվիրած թեստերը ո՞նց ենք բերելու, մեքենայով էլ չենք կարա։ Ես կողմ եմ, բայց կդիմանա՞նք դրան»,- նշեց Արսեն Թորոսյանը։