Ձեր վստահելի աղբյուրը

Հայաստանում կորոնվիրուսի արագ տարածումը կանխելու համար հայտարարված արտակարգ դրության պայմաններում շատ ձեռնարկություններ, օբյեկտներ, արտադրություններ, ուսումնական հաստատություններ մինչև ապրիլի 14-ը չեն գործի։ Նախատեսված միջոցառումները կամ չեղարկվում են, կամ հետաձգվում անորոշ ժամանակով։

Ստեղծված պայմաններում առավել խոցելի են դառնում օրավարձով աշխատող մարդիկ, հատկապես միայնակ մայրերն ու սոցիալապես անապահով ու բազմազավակ ընտանիքները։

Եթե նախկինում մանկապարտեզում երեխաները սնվում էին, ու ծնողը կարող էր միայն մեկ անգամ կերակրել նրանց, ապա հիմա այլ է, համ ապրուստի միջոցից են կտրվել, համ ծախսերն են ավելացել։ Իրավիճակն ավելի է բարդացրել վերջին օրերին ջերմաստիճանի անկումը։

Պետությունն էլ, Երևանի քաղաքապետարանն էլ նման ընտանիքներին աջակցելու քայլեր անում են, սակայն 30 տոկոս աղքատ բնակչություն ունեցող երկրի համար դրանք բավարար չեն։

«Բարի մամա» ՀԿ-ի հիմնադիր Մարինե Ադուլյանը վերջին մի քանի օրերի ընթացքում հարյուրավոր զանգեր ու օգնության խնդրանքներ է ստանում տարբեր ընտանիքներից, հատկապես հաշմանդամություն ունեցող երեխաների, ինչպես նաև միայնակ մայրերից ու Գյումրիի բնակիչներից։

«Երեկ առավոտյան մենք ունեինք 123 օգնության կարիք ունեցողի ցուցակ, օրվա վերջում դարձավ 164։ Մենք աշխատում ենք մարզպետարանների հետ համագործակցությամբ, որպեսզի սխալ  ինֆորմացիա չլինի, տրամադրվող օգնությունն էլ հավասարաչափ ու հասցեական բաշխվի։ Մեզ ամեն օր անդադար գրում են, զանգում օգնության խնդրանքով, մերժել չենք կարող, մարդիկ պայքարում են սովի ու ցրտի դեմ։ Մամաներ կան, որ մաքրություն են անում, աման են լվանում, վարսավիր են, օրական մի քանի հազար դրամ էին աշխատում, երեխաներին ուտելիք առնում։ Հիմա փակվել են աշխատատեղերը, այդ երեխաներն ի՞նչ ուտեն։ Նման ընտանիքները շատ շատ են, ես չէի պատկերացնում, որ Հայաստանում այս վիճակն է»,- Panorama.am-ի հետ զրույցում սրտնեղում է ՀԿ նախագահը։

Օգնության կանչին արձագանքել են անհատ քաղաքացիներ, ընկերություններ, հայտնի մարդիկ։ 30 ընտանիքի համար օգնություն ուղարկվել է Սյունիքի մարզի Գորիս քաղաք, ևս 30 փաթեթ շուտով կուղարկվի Լոռի, Երևանի ու հարակից բնակավայրերում ապրողներին էլ օգնություն է տրամադրվել, ուրբաթ հավաքած սնունդը բաժանելու համար մեկնելու են Գեղարքունիք։ Ցուցակագրված ընտանիքներից այս պահին չի հավաքվել 23-ի փաթեթները։

Առավել շատ ընտանիքների օգնելու համար Մարինան կազմել է առաջին անհրաժեշտության ապրանքների ցանկ, դրանց ընդհանուր գումարը կազմում է 12 հազար դրամ, խանութների հետ բարեխոսելու արդյունքում գինը նվազում է մինչև 10 հազար դրամ՝

15 հատ ձու
2 կգ հնդկաձավար
2 կգ բրինձ
4 կգ մակառոն
1 տուփ գերկուլես
1 հատ ձեթ
1 հատ յուղ 0,5 կգ
2 հատ խտացրած կաթ
1 հատ աղ
2 կգ ալյուր
1 կգ շաքարավազ
թեյ
2 հատ մանկական օճառ
1 հատ մանկական շամպուն
Տակդիր (1֊7 համարի, կախված երեխայի տարիքից)։

Չնայած ինքն իրեն խոստացել էր ցուցակագրած մարդկանց օգնելով սահմանափակվել,  քանի որ ֆիզիկապես չի հասցնում, բայց զանգերի թիվն ու լսած պատմությունները  ստիպել են վերանայել որոշումը։

«Սիրտս կանգնում է, մարդիկ ցրտի ու սովի մեջ են, ահավոր է»,- ասում է նա։

«Բարի մամա»-ի օգնությանը դիմած ու ծայրահեղ կարիքի մեջ գտնվող ընտանիքներին աջակցելու համար կարող եք ուղարկել փաթեթները Բարի տնակ (Ջրվեժ, Այգեգործական 6, 1/2) կամ գումար փոխանցել։ Կոնտակտային հեռախոսահամար ՝ 055257900։

Հաշվեհամար`
1510027478070100 (ՀՀ դրամ) Ստացող` «Բարի մամա» բարեգործական ՀԿ, Արարատբանկ
Arca Online: 5220651100213464
Карта Сбербанка: 4276 3801 5267 6156
Idram - 770123970 (հնարավոր է փոխանցում կատարել ցանկացած տերմինալից կամ վճարային ապարատներից՝ գտնելով դրամական համակարգեր կամ փոխանցումներ բաժինը, այնուհետև Idram և կատարել փոխանցում նշված համարին)
Paypal: [email protected]