Վիտալի Բալասանյանը կոչ է անում Արցախում հայտարարել արտակարգ դրություն
Արցախի նախագահի թեկնածու Վիտալի Բալասանյանը ուղերձ է հղել, որում, մասնավորապես, ասված է.
«Հաշվի առնելով Հայաստանում և հարևան մյուս երկրներում տիրող կորոնավիրուսային իրավիճակը, համարում եմ, որ անհրաժեշտ է հայտարարել արտակարգ դրություն: Եվ ինչքան շուտ մենք դա անենք, այնքան մեծ կլինի աղետից խուսափելու հնարավորությունը:
Արցախը և Հայաստանը իրաից մեկուսացված տարածքներ չեն: Այո, այսօր սահմանին վերահսկողություն իրականացվում է, բայց ուշադրություն են դարձնում միայն ակնհայտ ախտանիշներ ունեցող մարդկանց, սակայն վիրուսի ինկուբացիոն ժամանակահատվածը 14 օր է: Մարդը կարող է լինել վարակակիր, վիրուսի փոխանցող` չիմանալով իր հիվանդ լինելու մասին:
Բացի այդ, մենք ունենք սահմաններ այլ պետությունների հետ, որտեղ կան` թե հիվանդությունների առանձին դեպքեր կամ՝ արդեն իսկ հայտարարված է համաճարակի մասին: Իրանում, որի հետ մենք ունենք 105 կմ սահման, գրանցված է ավելի քան 16 հազար դեպք և գրեթե հազար մահ: Այս սահմանը, իհարկե, փակ է մարդկանց համար, բայց ոչ` կենդանիների և թռչունների համար, որոնք կարող են լինել վիրուսակիր:
Ցավոք, այսօր մենք չենք կարող բացարձակ համոզվածությամբ պնդել, որ Արցախում չկա կորոնավիրուս: Սակայն, եթե նույնիսկ դա դեռ այդպես է, մենք պետք է հրատապ միջոցներ ձեռնարկենք վարակի ներթափանցումը կանխելու և համաճարակ թույլ չտալու համար: Նման իրավիճակում բժիշկներն ու համաճարակաբանները միայն մեկ խորհուրդ են տալիս՝ հայտարարել արտակարգ դրություն, փակել սահմանները, չեղարկել զանգվածային միջոցառումները և խստրեն պահպանել կարանտինի պահանջները:
Մեզ անհրաժեշտ է ձեռնարկել բոլոր արտակարգ միջոցառումները, որոնք այժմ ձեռնարկվում են Հայաստանում: Անհրաժեշտ է Արցախը ապահովել թեստերով, դիմակներով, ալկոհելերով և, իհարկե, մասնագետներով, որոնք ունակ են վերահսկել իրավիճակը: Անհրաժեշտ է նաև պաշտպանել բժիշկների առողջությունը:
Սիրելի՛ արցախցիներ,
Ես կպահանջեմ, որ այդ որոշումը կայացվի իշխանությունների կողմից: Բայց մինչ իշխանությունները մտածում և ձգձգում են, մենք պետք է պատասխանատվություն ստանձնենք սեփական և մեր հարազատների առողջության համար: Ես կոչ եմ անում ինքնուրույն պահպանել արտակարգ դրության պահանջները»-նշված է Բալասանյանի գրասենյակից տարածված հաղորդագրության մեջ:
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
