Ձեր վստահելի աղբյուրը

Աշխարհում կորոնավիրուսից մահվան մեկ երրորդ դեպքերը գրանցված են Իտալիայում։ Անցած օրվա ընթացքում այնտեղ մահացել է 345 վարակած։ Վարակի տարածման սկզբից Իտալիայում մահացել է ավելի քան 2500 մարդ։ Եվրանյուզը գրում է, որ ամենաբարդ համաճարակաբանական իրավիճակը Լոմբարդիայի մարզում է, և տեղական առողջապահական համակարգն այլևս ի վիճակի չէ հաղթահարել հիվանդների ներհոսքը: Վերջին տվյալներով, Բրեշիա քաղաքը դառնում է նոր բռնկման օջախ։ Քաղաքային կլինիկական հիվանդանոցի անեսթեզիոլոգիայի և ինտենսիվ թերապիայի բաժանմունքի վարիչն ասել է, որ կորոնավիրուսը տարածվում է բարձր տեմպերով:

«Տեղի ունեցածի բանալին. բոլոր օտար պետությունները պետք է լսեն՝  սկսել գործել հնարավորինս շուտ, որպեսզի խուսափեն, ինչպես մեր դեպքում, ամենօրյա սպառիչ պայքարից: Անհրաժեշտ է նախապես պատրաստել տարածքը ինտենսիվ թերապիայի համար: Մեզ փրկում է այն, որ կարողացանք կրճատել գործողությունների քանակը և օգտագործել ազատված ռեսուրսները»,- բացատրել է նա։

Իտալիայում չի նվազում վարակման դեպքերը։ Անցած օրվա ընթացքում հայտնաբերվել է գրեթե 3 հազար նոր դեպք: Համաճարակի սկզբից ի վեր վարակվածների թիվը հասել է 31,5 հազարի: Միևնույն ժամանակ, վարչապետը նախազգուշացրել է, որ երկրում կորոնավիրուսային համաճարակի գագաթնակետը դեռ չի անցել:

Իտալիայում վարակվել է 2300 բուժաշխատող: Իտալիայում բուժանձնակազմին պաշտպանելու համար արդեն իսկ չկան բավարար դիմակներ և ձեռնոցներ, քանի որ դրանք երկրում չեն արտադրվում: Բանտարկյալները սկսել են կարել բժշկական դիմակներ։ Արդարադատության նախարարության տվյալներով, ծավալը կարող է լինել օրական մոտ 10 հազար: