Ճգնաժամային իրավիճակում ի՞նչ է առաջարկում կառավարությունը տնտեսվարողներին
Կորոնավիրուսի հետևանքով շուկայում սպառման անկանոն վիճակի, այդ թվում նվազման պայմաններում Հայաստանի կառավարությունը կփորձի ստեղծել ֆինանսավորման բարձիկներ։ Հանրային քննարկման դրվող փաթեթի մասին կառավարության նիստում մանրամասներ ներկայացրեց փոխվարչապետ Մհեր Գրիգորյանը։
«Այդ բարձիկները օգտագործեկով մենք հնարավորություն կունենանք անկանոն սպառման ժամանակահատվածն անցնել առանց էական վնասների ու կորուստների»,- ասաց նա։
Գործադիրի առաջարկած փաթեթով ձևավորվել է պոտենցիալ վարկային պրոդուկտների մի շարք, որը ենթադրում է վարկերի համաֆինանսավորում, վարկերի վերաֆինանսավորում ու տոկոսների սուբսիդավորում։
«Օժանդակության այս երեք ձևերով մենք լուծել ենք վարկառուների հնարավոր խնդիրները»,- նշեց Գրիգորյանը։
Նրա խոսքով, դա թույլ կտա բիզնեսին on-hold մնալ որոշակի ժամանակաշրջան՝ հոգալ ծախսերը, չունենալ տոկոսային բեռ, արժույթային ռիսկ, միաժամանակ պահպանել աշխատակիցներին։
«Այս փուլի համար որպես առաջին փաթեթ սա հնարավորություն է տալիս բարեխիղճ տնտեսվարողներին այս իրավիճակում նայել, հետևել, մտածել բիզնեսի զարգացման մասին, ոչ թե բիզնեսի օպտիմալացման ցայտնոտի մեջ ընկնել»,- կարծիք հայտնեց Գրիգորյանը։
Վարչապետ Նիկոլ Փաշինյանը մանրամասնեց, որ առաջարկում են ճգնաժամային վարկային պորտֆելներ բիզնեսին, ֆինանսավորման 50 տոկոսն իրականացնում են բանկերն ու առևտրային կազմակերպությունը, մինչև 50 տոկոսը առանց տոկոսների ֆինանսավորում է կառավարությունը, բանկերի տրամադրած վարկի տոկոսներն էլ սուբսիդավորում է կառավարությունը։
«Այսինքն, տնտեսվարողը 0 տոկոսով ստանում է վարկային միջոց։ Դրանք կարող են օգտագործվել աշխատակիցներին աշխատավարձեր կամ դրան հավասարեցված վճարների վճարման համար, յուրաքանչյուր աշխատողի համար ոչ ավելի քան 500 հազար դրամի չափով և ոչ ավելի, քան երեք ամսով»,- մանրամասնեց նա։
Նույն պայմաններով վարկային միջոց կտրամադրվի հումքի գնման կամ ներմուծման դեպքում, եթե իհարկե, հումքի ողջ ծավալը պետք է մնա Հայաստանում պատրաստի ապրանք ստանալու նպատակով, և վարկառու տնտեսվարողը տնօրինում է անհրաժեշտ արտադրական հզորությունների արտադրությունը կազմակերպելու համար։
Տնտեսվարողները կարող են այդ պայմաններով վարկային միջոցներ ձեռք բերել սարքերի ու սարքավորումների, այդ թվում գյուղատնտեսական նշանակության ձեռքբերման համար, եթե դրանք օգտագործվելու են Հայաստանում արտադրություն կազմակերպելու կամ այն ընդլայնելու համար։
Վարկային միջոցները կտրամադրվեն նաև գազի, էլեկտրաէներգիայի , ջրի գծով ծախսերի վճարման համար, բայց յուրաքանչյուր ծառայության դեպքում ոչ ավելի քան 5 մլն դրամ և ոչ ավելի, քան երեք ամիս։
Հարակից հրապարակումներ`
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
