Ձեր վստահելի աղբյուրը

«Առաջարկվում է արտակարգ դրության ժամանակ մեկուսացման կամ ինքնամեկուսացման պահանջները խախտելու դեպքում սահմանել վարչական տույժ՝ նվազագույն աշխատավարձի 300-ապատիկից մինչև 500-ապատիկի չափով»,- ԱԺ արտահերթ նիստի ընթացքում ասաց արդարադատության փոխնախարար Վահե Դանիելյանը՝ ներկայացնելով «Վարչական իրավախախտումների վերաբերյալ օրենսգրքում լրացումներ կատարելու» և «Քրեական օրենսգրքում լրացում կատարելու» օրենքների նախագծերի փաթեթը։

Նա նշեց, որ նախագծերը մշակվել են՝ հիմք ընդունելով հանգամանքը, որ ՀՀ-ում հայտարարվել է արտակարգ դրություն, որի շրջանակում մարդկանց հիմնական իրավունքները սահմանափակվում են, սակայն որոշ սահմանափակումների դեպքում ՀՀ օրենքներով նախատեսված չեն կոնկրետ իրավական հետևանքներ։

«Իսկ այս օրենքներով ապահովվելու է արտակարգ իրավիճակի իրավական ռեժիմի սահմանված կարգը։ Այժմ մարդիկ մեկուսացվում և ինքնամեկուսացվում են՝ գիտակցելով հիվանդության տարածման նվազեցնելու միջոցառումների անհրաժեշտությունը։ Սակայն ոչ բոլոր քաղաքացիներն են հոժարակամ ինքնամեկուսացվում, կամ դրա ընթացքում ապահովում սահմանված կարգը»,- ասաց Դանիելյանը։

Արդարադատության փոխնախարարը նաև ներկայացրեց՝ ֆիզիկական և իրավաբանական անձանց կողմից արտակարգ դրության ժամանակ տեղեկությունների հրապարակման սահմանափակումները խախտելու դեպքում քաղաքացին կտուգանվի նվազագույն աշխատավարձի 50-ապատիկից մինչև 300-ապատիկի չափով։

«Բացի այդ, քրեական օրենսգրքում առաջարկում ենք ավելացնել, որ  արտակարգ դրության ժամանակ մեկուսացման կամ ինքնամեկուսացման պահանջները խախտելը, որն անզգուշությամբ առաջացրել է մարդկանց զանգվածային հիվանդացում, պատժվում է կալանքով՝ առավելագույնը 3 ամսով, կամ ազատազրկմամբ՝ առավելագույնը 5 տարի ժամկետով»,- ասաց Դանիելյանը։