Ձեր վստահելի աղբյուրը

ԱՄՆ Պետդեպարտամենտը չի մեկնաբանում նավթի շուկայում տիրող իրավիճակով պայմանավորված Ռուսաստանի դեմ պատժամիջոցներ կիրառելու հնարավորությունը , բայց պնդում է, որ Մոսկվան թշնամական գործողություններ է իրականացնում էներգետիկ ոլորտում: Այս հայտարարությունն ուրբաթ օրը ճեպազրույցի ժամանակ լրագրողներին արել է ԱՄՆ դեպարտամենտի բարձրաստիճան ներկայացուցիչը, գրում է ՏԱՍՍ գործակալությունը:

«Մենք չենք խոսում պատժամիջոցների մասին: Մենք նախապես չենք տեղեկացնում պատժամիջոցների մասին: Սա հակասում է մեր քաղաքականությանը, այնպես որ ես չեմ մեկնաբանելու այն», - ասել է նա ՝ պատասխանելով այն հարցին, թե ԱՄՆ-ը քննարկո՞ւմ է պատժամիջոցները Ռուսաստանի դեմ, որպեսզի կայունացնի նավթի գները:

«Մենք հայտնաբերել ենք բազմաթիվ դեպքեր, և ոչ գործադիրում, այլև Կոնգրեսը, հրապարակել  ենք բազմաթիվ օրինակներ, երբ Ռուսաստանը էներգետիկան օգտագործում էր որպես թշնամական խաղացող, այն օգտագործում էր թշնամական նպատակներով, և ես այլ բան չեմ ավելացնի», - նշել է ԱՄՆ արտաքին գերատեսչության ներկայացուցիչը:

Նա հրաժարվեց պարզաբանել, թե ԱՄՆ Պետդեպարտամենտի ներկայացուցիչները արդյոք բանակցություններ են վարել ռուսական կողմի հետ ՝ կապված նավթային շուկայում տիրող իրավիճակի հետ: «Մենք չենք խորանալու որևէ մասնավոր քննարկումների մեջ, որոնք ունեցել ենք երկրների հետ», - ասել է նա ՝ պատասխանելով հնչած  հարցին:

«Մենք կոչ ենք անում բոլոր խաղացողներին ուշադրություն դարձնել գլոբալ անորոշության և տնտեսական դժվարությունների այս վիճակին և պատասխանատու գործողություններ ձեռնարկել, որպեսզի միասին հաղթահարենք դրանք» - հավելել է ամերիկացի դիվանագետը:

Հինգշաբթի օրը ԱՄՆ նախագահ Դոնալդ Թրամփն ասել էր, որ անհրաժեշտ պահին մտադիր է միանալ նավթի հարցում Ռուսաստանի և Սաուդյան Արաբիայի միջև տարաձայնությունների շուրջ քննարկումներին:

Ռուսաստանի նախագահի մամուլի խոսնակ Դմիտրի Պեսկովի խոսքերով, Ռուսաստանը և Սաուդյան Արաբիան չեն պատերազմում նավթի գների շուրջ: Նա նաև վստահություն է հայտնել, որ մյուս պետությունները չպետք է խառնվեն երկու երկրների գործընկերային հարաբերություններին: «ԱՄՆ-ի հսկայական նավթային հատվածն այժմ տագնապի մեջ է ներկայիս գների պատճառով»,- հայտնել է Պեսկովը:

Վկայակոչելով ամերիկացի բարձրաստիճան պաշտոնյաներին, «Ռոյթեր» գործակալությունը հաղորդել է՝ ԱՄՆ վարչակազմը պլանավորում է ներկայացուցիչ ուղարկել Սաուդյան Արաբիային ՝ նավթային շուկայում իրավիճակի կայունացմանն ուղղված ջանքեր գործարելու նպատակով:

Գործակալության տվյալներով՝ Վաշինգտոնում կարծում են, որ Սաուդյան Արաբիայի  նավթի շուկաների գերհագեցումը սրում է համաշխարհային տնտեսության իրավիճակը՝ կապված կորոնավիրուսի բռնկման հետ: ԱՄՆ էներգետիկայի դեպարտամենտի ներկայացուցիչը առնվազն մի քանի ամիս կմնա  Էր-Ռիյադում: