Ձեր վստահելի աղբյուրը

Եվրոպացի և ամերիկացի կինոռեժիսորները, պրոդյուսերները, երաժիշտներն ու համերգների կազմակերպիչները պատմել են այն մասին, թե ինչպես է կորոնավիրուսի պանդեմիան սնանկացրել երաժշտական և կինո արդյունաբերությունը և ինչպես է հասարակական միջոցառումների արգելքը հանգեցրել այս ինդուստրիայի աշխատակիցների ֆինանսական խնդիրների։ Լենտա.ռու-ի հաղորդմամբ, նրանց խոսքերը մեջբերել է The Guardian-ը։

Բրիտանացի երգիչ Գրեյս Քարտերը կիսվել է, որ ինքն է չեղարկել Եվրոպա համերգային շրջագայությունը, քանի որ իշխանությունների կողմից պաշտոնական արգելքներ չէին եղել, իսկ իր երկրպագուները, չնայած պանդեմիայի մասին նորություններին, միևնույն է, պատրաստվում էին գալ շոու: Նա նշել է, որ նման որոշում դժվարությամբ է կայացրել, քանի որ ելույթների չեղարկման պատճառով իր թիմը զրկվել է աշխատավարձից։

Եվրոպայում փառատոների կազմակերպիչները նույնպես դժգոհել են, որ անորոշության մթնոլորտի պատճառով, որ իշխանությունները ստեղծեցին կորոնավիրուսի տարածման վաղ փուլերում, նրանք ստիպված էին ինքնուրույն ընտրել ֆինանսական բարեկեցության և շրջապատի հոգատարության միջև:

«Մենք ուզում էինք, որ մեզ ասեն՝ ինչ անել, եթե ասեին փակել, որևէ մեկը չէր վիճելու»,- ասել է երաժշտական փառատոների կազմակերպմամբ զբաղվող Super Friendz ընկերության ներկայացուցիչը։

Ամերիկացի երաժիշտ Քրիս Ֆորսայթը ԱՄՆ-ում տեղի ունեցողը համեմատել է 2001 թվականի սեպտեմբերին Նյու Յորքում տեղի ունեցած ահաբեկչության հետ։

«Երկրպագուները չեն կասկածում, թե որքան փխրուն է երաժիշտների մեծամասնության ֆինանսական իրավիճակը: Շատերը հաճախ բարմենից շատ չեն ստանում», - դժգոհել է նա:

Ռեժիսոր Քևին Մաքդոնալդը հաշվարկել է, թե աշխարհում տեղի ունեցողը ինչ կործանարար ազդեցություն կթողնի կինոարդյունաբերության վրա, քանի որ ոչ ոք հաստատ չի կարող ասել, որ կինոթատրոնները կաշխատեն աշնանը:

««Universal» ստուդիան հայտարարել է, որ ինտերնետում կկազմակերպի նոր ֆիլմերի պրեմիերաները։ Սա ուղղակի շոկային հայտարարություն է՝ հաշվի առնելով, որ տարիներ շարունակ նա պաշտպանում էր կինոնկարի բացառիկ պրեմիերաների իրավունքը»,- ասել է նա։

Բրիտանական անկախ Light House cinema կինոթատրոնի ղեկավարը հայտարարել է, որ վարակվելուց խուսափելու համար մեկուսանալու՝ իշխանությունների առաջարկություններից հետո իրենց եկամուտները նվազել են 90 տոկոսով։

Բազմաթիվ կինեմատոգրաֆիստներ նույնպես պատմել են այն մասին, թե ինչպես էին ստիպված դադարեցրել աշխատանքները նախագծերի վրա և ինչպես են նրանք մնացել առանց գումարի: