Ձեր վստահելի աղբյուրը

Կառավարության մամուլի կենտրոնում տեղի ունեցած մամուլի ասուլիսի ընթացքում  Շտապօգնության ծառայության տնօրեն Թագուհի Ստեփանյանը տեղեկացրեց, որ շտապ օգնությունը  միշտ աշխատում է արտակարգ ռեժիմով: Նրա փոխանցմամբ՝  կանչերի թիվը հունվար,փետրվար ամիսների համեմատությամբ չի  ավելացել:

«Պետք է նշեմ, որ կանչերի թիվը պակասել է: Եթե հունվար- փետրվարին սպասարկել ենք  900-950 կանչ, ապա այժմ՝ 700-750 կանչ»,-ասաց Ստեփանյանը: 

Հատկանշական է, որ սուր շնչառական հիվանդություններով պայմանավորված կանչերի թիվը ևս նվազել է: Այսուհանդերձ, Երևանում հիմնական կանչերը վերաբերում են  սիրտ-անոթային հիվանդություներին, շուրջ ՝ 20 տոկոս, այնուհետև՝ սուր շնչառական հիվանդություններին՝ շուրջ 10-15 տոկոս  և 5 տոկոս վնասվածքներին: Ստեփանյանի խոսքով ՝ շտապ օգնության կանչերի մեջ կան նաև քաղաքացիներ, որոնք խուճապի մատնված են զանգում:

«Հորդորում եմ մեր համաքաղաքացիներին, զանգել շտապ օգնություն միայն ծայրահեղ անհրաժեշտության  դեպքում: Միայն թոք լսելու համար մի կանչեք: Կամ էլ շատերը կարծում են, թե շտապ օգնությունը պետք է գա և տանի  կորոնավիրուսով թեստավորելու, ոչ, դրա համար կան կոնկրետ սիմտոմներ, բացի այդ դա արվում է Նորքի ինֆեկցիոն հիվանդանոցում,- ասաց Թագուհի Ստեփանյանը:

Ինչ վերաբերում է  շտապ օգնության աշխատակիցներին, որոնք կասկածվում էին  կորոնավիրուսով վարակված լինելու մեջ, ապա Շտապօգնության ծառայության տնօրենը  հայտնեց, որ այժմ ոչ մի աշխատակից չունեն նման կասկածով:

«Այսօրվա դրությամբ ոչ մի աշխատակից չկա մեկուսացված:Այն  երեք հոգին , որոնց մասին խոսվում էր, մեկուսացվել էին և տասնչորս օր անց նրանց մոտ  ոչինչ չհայտնաբերելով անցել են բնականոն կյանքի»,- տեղեկացրեց Ստեփանյանը:

Թե օրվա ընթացքում քանի  կորոնավիրուսի կասկածանքով  կանչ է արձանագրվում,  ապա Թագուհի Ստեփանյանն  ասաց, որ  ստույգ տվյալներ չկան, քանի որ շտապ գնությունը նման ախտորոշման  իրավասություն չունի: Ախտորոշումը տրվում է ինֆեկցիոն հիվանդանոցում՝ համապատասխան հետազոտությունից հետո:Նրա պարզաբանմամբ՝ շտապ օգնությունը անձին  հիվանդության ախտանշաններնով տեղափոխում է՝ որպես սուր շնչառական  խնդիրներ ունեցող: