Ձեր վստահելի աղբյուրը

«Այն ոլորտների համար, որոնք պարետատան հրահանգով պետք է դադարեցնեն աշխատանքերը,  պետք  է հայտարարվի հարկային արձակուրդ: Որովհետև, եթե չեն աշխատելու, չի ձևավորվի եկամուտ և բնական է, որ պետությունն այդ ընկերություններից չպետք է ակնկալի հարկային պարտականությունների կատարում»,- այսօր ԱԺ-ում հայտարարեց «Լուսավոր Հայաստան»  խմբակցության պատգամավոր Գևորգ Գորգիսյանը՝ կարևորելով քաղաքացու և գործարարների կողքին պետության ներկայությունը:

«Այդ ոլորտում աշխատող քաղաքացիներին պետությունը նեցուկ պետք է լինի: Մասնավորապես՝ առնվազը նվազագույն աշխատավարձի չափով որոշակի փոխհատուցում տրամադրի, որը կօգնի ապրուստի միջոցը կորցրած քաղաքացիներին որևէ կերպ գոյատևել»,- հայտարարեց պատգամավորը:

Գորգիսյանը նկատեց, որ երբ հայտարարվում է, որ խոցելի խմբերը չպետք է աշխատեն, ապա դա պետք է վերահսկվի: «Այսօր մենք քաղաքացիներից ստանում ենք ահազանգեր, որոնք ասում են, որ գտնվում են խոցելի խմբում, բայց նրանց գործատուն պահանջում է, որ նրանք գան աշխատանքի»,- հայտարարեց պատգամավորը և կոչ արեց վերահսկողությունն ուժեղացնել, որպեսզի այդ քաղաքացիների կյանքը վտանգի չենթարկեն:

«Լուսավոր Հայաստան»  խմբակցության  անդամը կարևորեց  պետության կողմից գործունեության հստակ մեխանիզմների սահմանումը հատկապերս սննդի ոլորտում գործունեությունը շարունակող ձեռնարկությունների համար:

«Հեռավար կրթության պարագայում կարևոր ենք համարում անապահով ընտանիքների համար այդ կրթության հասանելիության ապահովումը: Եթե կան նման ընտանիքներ, ապա նրանց տրվի տեխնիկական համապատասխան միջոցներ, որպեսզի կարողանան մասնակցել հեռավար ուսուցմանը»,-նկատեց պատգամավորը և վերջում կոչ ուղղեց բնակչությանը. «Հարգելի քաղաքացիներ,  կարևոր է, որ ամեն մեկս լինենք զգույշ, պատասխանատու մեր գործունեության մեջ և  ամեն մեկս հետևենք, որպեսզի չդառնանք վիրուսի տարածող և չվտանգենք մեր հարազատների ու մտերիմների առողջությունը»: