Ձեր վստահելի աղբյուրը

«Իմ առաջարկը ծնվել է վարչապետի հայտարարությունից հետո, որ այսօրվանից չեն գործելու սրճարաններն ու ռեստորանները, ինչպես նաև որոշ գործարաններ»,- այսօր խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանն՝ անդրադառնալով իր՝ ԱԺ նիստը հետաձգելու կոչին։

Նրա խոսքով, այսօր խորհրդարանի օրակարգում չկան այնպիսի հարցեր, որոնք հրատապ են, և քաղաքական համաձայնության արդյունքում կարող էին չգումարել նիստեր՝ քվորում չապահովելով։

«Իմ առաջարկը սրա հետ էր կապված, և ես առաջարկում էի՝ ԱԺ խորհուրդը մնա շենքում, իսկ մյուս պատգամավորները գնան տուն։ Դրա մասին էր խոսքը, և ոչ նրա, որ ես գնամ նստեմ տանը, մյուսներն աշխատեն։ Իմ առաջարկը լավ չընդունվեց, և որոշ մարդկանց համար առիթ հանդիսացավ հերոսանալու, որ իրենք կաշխատեն։ Այդպես էլ է լինում»,- ասաց Մարուքյանը։

Հարցին, թե ինչու բժշկական դիմակ չի կրում, Մարուքյանը պատասխանեց ՝անընդհատ ձեռքերը սպիրտով լվանում է, բայց, իր կարծիքով, դիմակով պաշտպանվելն անարդյունավետ է.

«Եթե մի մարդ էլ հիվանդ լինի այստեղ, բոլորը վարակվելու են, հետևաբար անիմաստ է։ Ցուցումը հետևյալն է՝ մի հավաքվեք, իրարից դիստանցիա պահեք, հիգիենայի միջոցները կիրառեք, բայց երբ առաջին՝ չհավաքվելու ցուցումը խախտվում է, մնացած ցուցումները անիմաստ են դառնում»։

Մարուքյանն ընդգծեց՝ երբ ասվում է՝ չպետք է հավաքվել, այդ կանոնը պետք է վերաբերի բոլորին։

«Ես լսել եմ, որ ասում են՝ եթե լուրջ լինի այդ ցուցումը, խորհրդարանում էլ նիստեր չեն լինի, բայց եթե խորհրդարանում լուրջ չեն վերաբերում այդ կոչին, քաղաքացիներն ինչո՞ւ պետք է լուրջ վերաբերվեն»,- նշեց Մարուքյանը։

Ըստ պատգամավորի, այսօր քաղաքացիները հայտնվել են մի իրավիճակում, երբ պետությունը միջամտում է նրանց տնտեսական  գործունեությանը, և դադարեցնում մի շարք ընկերությունների աշխատանքներ.

«Հիմա պատկերացրեք Չարենցավանից Երևան եկած  մի կին, որ սրճարանում մատուցողուհի է աշխատել, հիմա տան վարձը, կոմունալներն ու վարկերը վճարելու խնդիր ունի։ Այսինքն՝  էս խնդիրները կան և 1000-ավոր մարդկանց հուզող հարցեր են սրանք։ Պետությունը պետք է ֆինանսական աջակցություն ցուցաբերի այն ոլորտներում աշխատող մարդկանց, որոնք ամենախոցվածն են։ Ամբողջ աշխարհում այդ պրակտիկան է գործում։ Պետությունն ունի ռեզերվներ, և պետք է դրանք օգտագործի, այլ ոչ թե ասի՝ գնացեք 0 տոկոսով վարկ վերցրեք, ինչն անարդյունավետ միջոց է։ Հիմա վտանգ կա, որ բանկերն իրենց մտերիմ գործարաններին կտան այդ 0 տոկոսով վարկերը, դրանք գործարարները կվերցնեն, իրենց բարձր տոկոսով վարկերը կփակեն և կունենան 0 տոկոսով վարկ։ Այսինքն՝ դա չի հասնի տուժած քաղաքացուն»։

Մարուքյանը վստահեցնում է՝ բանկերից բողոքող քաղաքացիներին չի կարելի նորից բանկեր ուղարկել, այլ պետք է հետևել ԱՄՆ օրինակին, որ գումարը ծրարով ուղարկում է մարդկանց տներ։

«Իսկ այն ընկերությունները, որոնք կանգնած են փակման եզրին, անիմաստ են համարում այդ վարկը վերցնելը, քանի որ չեն կարողանալու հետո վերադարձնել»,- ասաց Մարուքյանը։

Դիտարկմանը, որ Մարուքյանը, փաստորեն, համակարծիք է ԱԺ «Բարգավաճ Հայաստան» խմբակցության ղեկավար Գագիկ Ծառուկյանի հետ, որ պետությունը պետք է աջակցի փակված ընկերությունների աշխատակիցներին, Մարուքյանն արձագանքեց՝ առաջինը ես եմ այդ կարծիքը հայտնել, ապա նոր պարոն Ծառուկյանը. «Տարբերությունն այն է, որ ես չունեմ հազարավոր աշխատակիցներ, ինքը՝ ունի»։

Պատգամավորը նաև նշեց, որ պետք է վիրուսի տարածման մասին ինֆորմացիան տրամադրելիս լինել թափանցիկ, քանի որ որքան ասվի, որ ամեն ինչ նորմալ է և անհանգստանալու կարիք չկա, այդքան վարակը տարածվելու է։

«Պետք է էս ամեն ինչին լուրջ վերաբերվել։ Այս ամենի նկատմամբ պետք է լրջություն ցուցաբերել, իսկ այսօրվա արձագանքը, որ եղավ իմ ելույթից հետո, խոսում է այն մասին, որ մենք անլուրջ ենք վերաբերում այս ամենին, այդ անիմաստ հերոսանալու կոչերը անլուրջ էին»,- եզրափակեց խոսքը  Մարուքյանը։