Ձեր վստահելի աղբյուրը

ՀՀ վարչապետ Նիկոլ Փաշինյանը տեսաուղերձով դիմել է ՀՀ քաղաքացիներին, ներկայացրել կորոնավիրուսով պայմանավորված իրավիճակն ու վերջին  տվյալները:

Նա, մասնավորապես, նշել է.

«Հայաստանը  և մարդկությունը դժվար օրեր են ապրում: Նոր կորոնավիրուսը ԱՀԿ-ի տվյալներով նոր թափ է հավաքում: Աշխարհում ավելի քան  350 հազ. կորոնավիրուսի հաստատված դեպք կա, ավելի քան 16 հազար մահացել է վարակից:
Ի՞նչ գիտենք կորոնավիրուսի մասին:

Դա վարակ է, որն անցնում է մարդուց մարդուն,  օդակաթիլային եղանակով, ախտահարում է շնչառական համակարգը, ուղեկցվում է ջերմությամբ և հասնում ընդհուպ ծայրահեղ ծանր թոքաբորբի: Սակայն Հայաստանի փորձը ցույց տվեց, որ հիվանդը կարող է   չունենալ  և ոչ մի ախտանշան, մարդը կարող է վարակված լինել, բայց չհազալ, շնչառական խնդիրներ ու ջերմություն չունենալ: Նման դեպքերում հիվանդությունը վտանգ չի ներկայացնում, սակայն խնդիրն այն է, որ նա կարող է վարակել շրջապատի մարդկանց: Համաշխարհային փորձը ցույց է տալիս, որ վիրուսը հիմնականում անվտանգ է երեխաների, երիտասարդների համար և նրա հիմնական զոհը դառնում են յոթանասունից բարձր տարիք ունեցող անձիք և խրոնիկ հիվանդություն ունեցողները:

Հետևաբար, հիմնական խնդիրը վատառողջ հայրենակիցների, մեր ծնողների, տատիկների և պապիկներին պաշտպանելն է և հնարավոր ամեն ինչ անել, որ նրանք խուսափեն վարակից: Իհարկե դա դատավճիռ չէ:Աշխարհում ավելի քան 100 հազար մարդ բուժվել է կորոնավիրուսից , այդ թվում 75-անց մարդիկ: Մենք պետք է ամեն ինչ անենք մահվան դեպքից խուսափելու համար: Սրան են միտված մեր բոլոր գործողությունները:  Դպրոցներում ուսման պրոցեսը դադարեցնելը, ինչպես նաև հետագայում ավելի խիստ սահմանափակումները:

Սիրելի հայրենակիցներ, ժամը 18.30-ի դրությամբ ունենք կորոնավիրուսի հաստատված 249 հիվանդ, որոնց մեծ մասը գտնվում է Նորք ինֆեկցիոն հիվանդանոցում: Նրանց մի մասը նույնիսկ ջերմություն չունի: Ընդհանուր առմամբ թոփաբորբ տանող 30 անձ կա, որոնցից հինգը գտնվում են ինտենսիվ թերապիայի բաժանմունքում , որոնցից մեկի ՝ 75-ամյա մեր հայրենակցի վիճակը ծայրահեղ ծանր է , իսկ չորսինը՝ ծանր»,-իր ուղերձում նշեց վարչապետը:

Վարչապետը նաև հույս հայտնեց, որ մեր համաքաղաքացիները կշարունակեն  մնալ տանը և հետևել կոչերին: 

«Այսօրվանից, առնվազն մեկ շաբաթով երկրում գործում են նոր սահմանափակումներ: Ինչը նշանակում է, որ հազարավոր ձեռնարկությունների աշխատակիցների աշխատանքը դադարեցվելու է և թույլատրվելու է միայն կենսական նշանակության կազմակերպությունների գործունեությունը և մարդկանց միայն կենսական անհրաժեշտ տեղաշարժը: Փողոց դուրս եկած քաղաքացիները պետք է հստակ բացատրություն ունենան, թե ուր են գնում : Տեղաշարժի մեջ գտնվող բոլոր քաղաքացիները պետք է ունենա անձը հաստատող փաստաթուղթ: Նշեմ միայն այսօրվանից փակ են բոլոր ռեստորաններն ու սրճարանները, աշխատելու են խանութներն ու դեղատները: Բայց ուզում եմ խնդրել, որ բոլորդ օգտվեք օնլայն ծառայություններից ու գնումներից:  Ուզում եմ նաև ներողություն խնդրել բոլորիցդ պատճառված անհարմարությունների համար: 

Բոլոր թոշակառուները  թոշակները կստանան առձեռն: Մաքսիմալ լրջությամբ վերաբերվել իրավիճակին և երկու հոգուց ավելի չհավաքվել անգամ բակերում, տանը մնալու ընթացքում պահպանել հակահամաճարակային հիգիենային:

Արժույթի միջազգային հիմնադրամը արդեն իսկ արձանագրել է, որ 2020թ. անկումային է լինելու համաշխարհային տնտեսության համար: Որոշ գնահատականների համաձայն անկումը ավելի խորն է լինելու, քան անգամ 2008-09 թվականների տնտեսական ճգնաժամի ժամանակ:

Հայաստանի պարագայում կանխատեսումներն այս պահի դրությամբ մի փոքր ավելի դրական են, բայց ակնհայտ է, որ մենք կորցնելու ենք աճի այն տեմպը, որը համատեղ աշխատանքի արդյունքում ձևավորեցինք 2019 թվականին: Բայց ինչպես ասել եմ նախկինում, այս իրավիճակը մենք ընկալում ենք ոչ թե որպես ողբերգություն, այլ որպես նոր հնարավորություն Համաշխարհային տնտեսության մեջ Հայաստանի տեղադիրքը փոխելու, տնտեսական հեղափոխության մեր օրակարգը ավելի արդյունավետ և կրկնապատիկ տեմպերով կյանքի կոչելու համար:

Ընդհանուր առմամբ կառավարությունը շուրջ 150 միլիարդ դրամ է տրամադրելու՝ իրականում ոչ թե ճգնաժամային այս վիճակին դիմադրելու, այլ ետճգնաժամային աշխարհում մեր հաղթանակները նախապատրաստելու համար: Կառավարության առաջիկա նիստում մենք կընդունենք նաև գյուղատնտեսության խթանման լայնածավալ ծրագիր: Ինչպես և խոստացել էի՝ բոլոր տեսակի նոր տրամադրվող գյուղատնտեսական վարկերի տոկոսները կառավարության կողմից կզրոյացվեն, ինչպես նաև առանձնահատուկ պայմաններ կստեղծվեն ռեալ աշխատող և նոր ձևավորվող գյուղատնտեսական կոոպերատիվների համար: Ես կոչ եմ անում մեր բոլոր գյուղացիներին ակտիվորեն զբաղվել գարնան գյուղատնտեսական աշխատանքներով, որովհետև նաև պարետատան որոշմամբ գործունեության այդ տեսակը համարվել է կենսական»: