Ձեր վստահելի աղբյուրը

Կորոնավիրուսի տարածման պատճառով Մեծ Բրիտանիայի վարչապետ Բորիս Ջոնսոնը հրահանգեց անհապաղ երկրում հաստատել երեք շաբաթյա կարանտին, ինչպես նաև հայտարարեց ոչ առաջնային անհրաժեշտության ապրանքների խանութների փակման մասին: Այգիները մնում են բաց, բայց այնտեղ հավաքելն արգելված է:

Բոլոր խմբակային միջոցառումները, ներառյալ հարսանիքները, մկրտությունները և այլ արարողություններ, բացառությամբ հուղարկավորության, կդադարեցվեն երկրում: Կփակվեն խաղահրապարակները և գրադարանները: Այս մասին գրում է euronews-ը։

Ջոնսոնը նշել է, որ երկրի առողջապահության ազգային համակարգը կստանա լրացուցիչ ֆինանսական և կադրային աջակցություն, կկազմակերպվի անհրաժեշտ բժշկական սարքավորումների արտադրություն, կարագացվի պատվաստանյութերի և հակավիրուսային գործակալների զարգացումը, և ձեռք կբերվի կորոնավիրուսային վարակի փորձարկման համար միլիոնավոր հավաքածուներ:

«Այս երեկո ես բրիտանացիներին տալիս եմ շատ պարզ ցուցում։ Սա է հիմնական բանը, որ մենք պետք է անենք, որպեսզի դադարեցվի հիվանդության տարածումը տնային տնտեսությունների միջև: Սահմանափակումները կվերանայվեն անընդհատ և երեք շաբաթ անց, ստացված տվյալների հիման վրա կառավարությունը կորոշի՝ արդյո՞ք այդ միջոցները կարող են թուլացվել»,-ասել է Բորիս Ջոնսոնը։

Երկրի բնակիչներին թույլատրվում է լքել իրենց տները միայն շատ հատուկենտ պատճառներով, մասնավորապես, սննդային ապրանքների ձեռքբերման համար, բայց որքան հնարավոր է քիչ: Կառավարության կանոնակարգերին համապատասխանությունը ստուգվելու է ոստիկանության կողմից:

Առաջիկայում երկրում պետք է ընդունվի օրենք, որը նրան կտա լրացուցիչ լիազորություններ և նախատեսում է տուգանքներ՝ կարանտինի խախտման համար: Օրական մեկ անգամ թույլատրվում է դուրս գալ տանից` մաքուր օդում սպորտով զբաղվելու համար:

Անցյալ շաբաթ արդեն փակվել են բարերն ու ռեստորաններ:

Ավելի վաղ երկրի առողջապահության նախարարությունը ցավով խոստովանել էր, որ բրիտանացիները լուրջ չեն ընդունում իշխանությունների կողմից սոցիալական հեռավորության պահանջը:

Նոր տիպի կորոնավիրուսային վարակի քանակով Մեծ Բրիտանիան զբաղեցնում է 10-րդ տեղն աշխարհում: Ըստ վերջին տվյալների, երկրում վարակված է ավելի քան 6600 մարդ, մահացել է 335-ը: Կառավարությունը խոստովանում է, որ վարակվածների իրական թիվը կարող է լինել ավելին, քան հաստատված դեպքերի քանակը:

Նշենք, որ կորոնավիրուսի՝ Եվրոպայում տարածման սկզբնական փուլում Բրիտանիայում խիստ միջոցառումներ չիրականացվեցին։ Բորիս Ջոնսոնը հայտարարում էր, որ վարակվելու է բնակչության մեծամասնությունը, շատերն էլ ժամանակից շուտ կորցնելու են իրենց սիրելիներին։