«Իրատես». Տնտեսությունը զրոյից կառուցելու համար բյուջեի հիմքում դրած ծրագրերն ամբողջությամբ վերանայման կարիք ունեն
«Իրատես» թերթը գրում է. «Տնտեսական պանդեմիան արդեն անխուսափելի է։ Բոլոր երկրների տնտեսությունները կաթվածահար են։ Համաշխարհային անորոշության մեջ դժվար է ասել, թե ինչ կլինի Հայաստանի փոքր ու խոցելի տնտեսության հետ։ Բայց մեր իշխանությունների լավատեսությունն անգամ գերտերությունների ղեկավարները չունեն։ Շատ պարզ մի պատճառով, որովհետև ինչպես Փաշինյանն է ասում, մենք ենք առաջինը գլխի ընկել ու սկսել տնտեսական հեղափոխությունը։ Բայց մի խնդրի շուրջ դեռ Նիկոլ Փաշինյանի կառավարությունը ոչ մի բան չի ասում։
Այսօր հայտարարում են իրավիճակային մեկ-երկու քայլերի մասին, ինչպես արտոնյալ վարկեր տրամադրել աջակցության կարիք ունեցող ընկերություններին, գյուղատնտեսական ոլորտի բոլոր ծրագրերում զրոյացնել վարկային միջոցների տոկոսները։ Շատ լավ, բայց տնտեսական կոլապսի մեջ են հայտնվում բոլոր ճյուղերը, ինչը ենթադրում է համալիր մոտեցում, եթե իհարկե, նպատակ կա ունենալու տնտեսական կայուն վիճակ։ Նոր իրողությունները նոր մոտեցումներ են պահանջում։ Ասել է՝ առողջապահական խնդիրը հաղթահարելուց հետո տնտեսական «համավարակին» դիմակայելու համար կառավարությունը վերանայելու՞ է այս տարվա արդեն հաստատված բյուջեն։ Այս հարցը բավական հետաքրքիր է, քանի որ այդ փաստաթուղթը լրիվ այլ տրամաբանությամբ է կազմվել և հազիվ թե այս ճգնաժամային իրավիճակն այսքան խորությամբ հաշվարկված լիներ։ Հարց է ծագում՝ թեկուզ օրենսդրական փոփոխություններով կառավարությունը բյուջեում որոշակի շտկումներ անելու՞ է։ Արդյոք նոր կառուցվածքով բյուջե ունենալու անհրաժեշտություն չկա՞։
Նիկոլ Փաշինյանը հայտարարեց, որ այսօր ամեն ինչ փլուզված է, ունենք նոր շինհրապարակ, որտեղ պիտի նոր կյանք, նոր տնտեսություն կառուցենք։ Այսինքն, պիտի տնտեսական կյանքն էլ զրոյից սկսել, իսկ սա չի՞ ենթադրում, որ ֆինանսատնտեսական գլխավոր փաստաթուղթը՝ բյուջեն, պետք է փոփոխվի կամ գուցե նորը հաստատվի ու հարմարեցվի այսօրվա իրավիճակին։ Ամեն դեպքում կառավարության ղեկավարի հայտարարությունից սա է ենթադրվում։ Տնտեսությունը զրոյից կառուցելու համար բյուջեի հիմքում դրած և կանխատեսումները, և ռիսկերը, և ծրագրերը, և ֆինանսավորվող ծրագրերն ամբողջությամբ վերանայման կարիք ունեն։ Մնում է՝ «վաստակաշատ» բյուջե կազմող Ատոմ Ջանջուղազյանին համոզել ու նորից գործի դնել»։
Մանրամասները թերթի այսօրվա համարում
Լրահոս
Տեսանյութեր
ԱԺ նիստը մեկնարկեց մեկ րոպե լռությամբ՝ ի հիշատակ պատգամավոր Մհեր Սահակյանի
