Ձեր վստահելի աղբյուրը

«Այսօրվա ընթացքում անհանգստացնող որոշակի ցուցանիշներ ենք ստացել, 41 նոր դեպք ունենք հաստատված։ Այս դեպքերի ծավալն ու աշխարհագրությունը որոշակի անհանգստություններ է առաջացնում»,- ֆեյսբուքյան ուղիղ եթերում հայտարարեց վարչապետ Նիկոլ Փաշինյանը։

Նա նշեց, որ Կոտայքի մարզի արտադրական ձեռնարկությունում, Երևանի Էրեբունի համայնքի արտադրական  ձեռնարկություններից մեկում է հայտնաբերվել վարակի դեպք։

«Մենք այս պայմաններում պետք է մեկ շաբաթով, նախնանական տվյալներով, ավելի ընդարձակ սահմանափակող միջոցներ ձեռնարկենք, որպեսզի վիրուսի հետագա  տարածումը կանխարգելենք»,-ասաց նա։ 

Ն. Փաշինյանն ասաց, որ կորոնավիրուսով վարակված անձանց թիվը  հասել է 235-ի, նրանցից 26-ն այս պահին ունեն թոքաբորբ, բայց նրանց վիճակը վերահսկելի է։ Ինչպես և նախկինում ախտորոշվածների մեծ մասը ջերմություն չունի, 37-38 աստիճան ջերմություն ունեն 34 հոգի, 38-39 աստիճան՝ 6 հոգի, 39-ից բարձր ջերմություն այս պահի դրությամբ ունի մեկ հոգի։

«Այս պայմաններում մեզ անհրաժեշտ է որոշակի, ավելի խիստ սահմանափակումներ մտցնել և ավելի խիստ ձևով մոտենալ արգելքներին։ Մասնավորապես, վաղվանից կարգելվեն բոլոր տեսակի ռեստորանների, սրճարանների գործունեությունը, բացառություն կանենք առաքման ծառայությունների համար։

Որոշակի կդադարեն շինարարական աշխատանքները, նաև տեքստիլ արտադրական ձեռնարկությունների, թեթև արդյունաբերության մի շարք ճյուղերի գործունությունը կդադարի։ Իհարկե, սովորական ռեժիմով կաշատեն խանութները, մթերային խանութները, սննդի արտադրությունը»,- ասաց վարչապետը։

Ն. Փաշինյանն ասաց, որ վաղը լավ լուրերի նույնպես սպասում են. ավելի քան 70 անձանց մեկուսացման 14 օրը լրանում է, նրանց նորից կթեստավորեն։ Նրա խոսքով,  նախադրյալներ կան մտածելու, որ մեծ մասը բացասական  կլինի, այսինքն կվերադառնան իրենց տները։

«Մեր այս ձեռնարկած միջոցները նպատակ ունեն նախ առավել ճշգրիտ հսկողություն սահմանել մեկուսացած ու ինքնամեկուսացած անձանց վրա, ուզում ենք հնարավորինս սահմանափակել քաղաքացիների տեղաշարժը, վարակի նոր դեպքերի արձանագրումը սահմանափակենք»,- ասաց նա։