Ձեր վստահելի աղբյուրը

Արտակարգ դրություն հայտարարելու որոշման մեջ, հաշվի առնելով քրեակատարողական հիմնարկի  առանձնահատկությունները, նախատեսված են որոշակի սահմանափակումներ։ Արդարադատության նախարարության  Հակակոռուպցիոն և քրեակատարողական քաղաքականության մշակման վարչության պետ Արփինե Սարգսյանն ասուլիսում ասաց, որ այդ սահմանափակումները բխում են դատապարտյալների, կալանավորների, նրանց մերձավոր  ազգականների շահերից։ Մասնավորապես,  որոշմամբ նախատեսված է տեսակցությունների արգելք, բացառություն տեսազանգը, արգելված են հանձնուքները, ծանրոցները, փաթեթները։   

Նա նշեց, որ արգելքը վերաբերում է բոլոր ապրանքներին, այդ թվում նաև հանձնուքներով ծխախոտի դեպքերին, քանի որ առանձին ապրանքների համար առանձին կարգավորումներ նախատեսված չեն։

Ա.Սարգսյանն ասաց, որ արդարադատության նախարարությունն առողջապահության նախարարության հետ համագործակցելով՝  վարակի տարածման կանխարգելիչ միջոցառումներ է իրականացնում ՔԿՀ-ներում։ Նրա ներկայացմամբ, ախտահանիչ նյութերով իրականացվում են սանիտարական մաքրումներ ոչ միայն ՔԿՀ վարչական հատվածում, նաև բնակելի գոտիներում, որտեղ գտնվում են ազատազրկվածները։ Դատապարտյալների ու կալանավորների շրջանում իրականացվում են բացատրական աշխատանքներ, կրճատվել է նրանց միջև  շփումը։ Նրա խոսքով, ՔԿՀ-ներում կան էլեկտրոնային ջերմաչափեր, որոնց միոջով ՔԿՀ մուտք և ելք ունցող բոլոր անձիք ջերմաչափվում են։  ՔԿՀ-ներից դուրս եկող կալանավորներին, դատապարտյալներին ու  ուղեկցող ստորաբաժանումներին տրամարդվում են դիմակներ ու ձեռնոցներ։

«Այս պահի դրությամբ ՔԿՀ-ներում վիճակը վերահսկելի է։ Անհաժեշտության դեպքում իրականացվել են տեստավորումներ, արդյունքները եղել են բացասական։ Քրեակատարողական ոչ մի հիմնարկում  վարակման դեպք չունենք»,- ասաց Արփինե Սարգսյանը։

 «Եթե  առկա լինեն սիմպտոմներ, բնականաբար, պետք է այդ անձի մեկուսացում իրականացվի։ Կիրականացվի տեստավորում։ Եթե արդյունքները լինեն  դրական, կիրականացվեն համապատասխան միջոցառումներ այնպես, ինչպես մյուս քաղաքացիների դեպքում, ոչ մի տարբերակում դատապարտված անձանց մասով չկա»,- հավելեց նա։