Ձեր վստահելի աղբյուրը

«Արտակարգ դրության ընթացքում մարդկանցից տեղաշարժման ձևաթուղթ պահանջելը սպասված քայլ էր, որովհետև միայն ինքնամեկուսացման կոչը բավարար չէր»,- այսօր խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը։

Նրա խոսքով, այն, ինչ այսօր անում է պետությունը՝ ներառյալ ձևաթղթի պահանջը, օրինաչափ է և շատ անհրաժեշտ։

«Այդ ձևաթուղթը ոչ միայն դուրս գալու թույլտվություն է, այլ նաև քաղաքացու հետագիծը վերահսկելու միջոց, որպեսզի հետո որևէ վարակի առկայության դեպքում հասկացվի՝ որտեղ է եղել այդ քաղաքացին, ում հետ է շփվել»,- նշեց Սամսոնյանը։

Հարցին՝ արդյոք պահանջը կարող է ամուր վերահսկողություն իրականացնել, եթե քաղաքացին ձևաթուղթը լրացնելով և անձնագիրը մոտը պահելով կարող է ազատ շրջել քաղաքում, Սամսոնյանը պատասխանեց՝ պարետատան կողմից կա պահանջ՝ կոնկրետ դեպքերում դուրս գալ։

«Եթե օրինակ դու աշխատում ես ընկերությունում, որի գործունեությունը չի արգելվել այս ընթացքում, կարող ես դուրս գալ, եթե ունես սնունդ գնելու, կամ տարեց հարազատիդ խնամելու կարիք, ապա կարող ես դուրս գալ։ Բայց եթե դու պիտի դուրս գաս, ընկերներիդ հանդիպես, բնականաբար, չպիտի դուրս գաս։ Այդ ձևաթղթի կիրառումը նաև քաղաքացիներին հետ է պահում դուրս գալուց, որովհետև այս դեպքում բոլոր ֆորմալ միջոցները մարդուն հետ են պահում տնից դուրս գալուց։ Ամեն ոչ անհրաժեշտ դեպքում մարդը տնից դուրս չի գա»,- պատասխանեց Սամսոնյանը։

Դիտարկմանը, որ  «Լուսավոր Հայաստան» խմբակցության պատգամավորները կորոնավիրուսի նկատմամբ իշխանության վերաբերմունքը համարում են անլուրջ, Սամսոնյանն արձագանքեց՝ ցանկացած որոշում, որն ընդունվում է պարետատան կողմից, պետք է նախ կառավարության և իշխանության լուրջ վերաբերմունքին արժանանա.

«Այն մարդիկ, ում կարծիքը հանրությունը լսում է, պետք է լուրջ վերաբերվեն պարետատան որոշումներին։ Երբեմն այդ որոշումների շուրջ արվող հումորները վերածվում են անլրջության, և դրա հետևանքը կարող է լինել այն, որ մարդիկ ևս սկսեն դրան անլուրջ վերաբերվել։ Այսինքն, մարդիկ պահի լրջությունն ու պատասխանատվությունը պետք է հասկանան»։

Ըստ Սամսոնյանի, պետք է ձեռնարկվեն բոլոր միջոցառումները, որպեսզի ապահովվի վարակվածների և մեկուսացվածների անվտանգությունը, նրանց պետք է ապահովել անհրաժեշտ առողջապահական ծառայություններով։ Բացի այդ, պատգամավորի խոսքով, պետք է արվեն քայլեր, որպեսզի մարդկանց՝ արտակարգ դրությունից առաջ ունեցած սոցիալական դրությունը պահպանվի նաև արտակարգ դրությունից հետո։

«Այդ սոցիալական դրությունից է կախված, թե հետո մարդիկ կկարողանան մուծել հարկերը, կոմունալները, վարկերը, այսինքն՝ որպես քաղաքացի կկարողանան կատարել իրենց պարտականությունները»,- ասաց Սամսոնյանը։

Հարցին՝ արդյոք հույս ունի, որ գործադիրի ներկայացուցիչները այս շրջանում կհրաժարվեն իրենց պարգևավճարներից, Սամսոնյանը պատասխանեց՝ եթե պատգամավորները հրաժարվում են, ապա կառավարության ներկայացուցիչները ևս կարող են հրաժարվել պարգևավճարներից.

«Իհարկե, դա իրենց իրավունքն է, բայց որպես պաշտոնյա, որպես պետության հանրային միջոցներից վարձատրվող անձինք՝ մենք պատասխանատվություն ենք զգում նաև այս պահով, ուրեմն դա պետք է նաև վերաբերի կառավարության ներկայացուցիչներին, հատկապես այն դեպքում, երբ կառավարության ներկայացուցիչներն ավելի բարձր աշխատավարձ են ստանում։ Որքանով ես գիտեմ, փոխնախարարներն էլ են ավելի բարձր աշխատավարձ ստանում, քան պատգամավորները»,- տեղեկացրեց նա։

Ինչ վերաբերում է ԵԱՀԿ-ի հայտարարությանը, որ կորոնավիրուսի օրերին գրաքննություն չպետք է լինի, ապա Սամսոնյանը նշեց, որ պետք է ապատեղեկատվության դեմ պայքարել, բայց միևնույն ժամանակ կան չիդենտիֆիկացված աղբյուրներ, որոնք ևս կարող են տարածել ապատեղեկատվություն։

«Եթե կա ապատեղեկատվություն տարածելու խնդիր, ապա դա կարվի այնպիսի աղբյուրներով, որոնք բարդ կիդենտիֆիկացվեն։ Բայց այս դեպքում տուժում են այն լրատվամիջոցները, որոնք կատարում են իրենց բարեխիղճ աշխատանքը։ Եվ այս դեպքում տեղեկատվության սահմանափակումը, որը թույլատրելի է արտակարգ դրության ընթացքում, կարող է բացասական ազդեցություն ունենալ Հայաստանի միջազգային վարկի վրա»,- եզրափակեց Սամսոնյանը։