Ձեր վստահելի աղբյուրը

«Հիմա 5 փաթեթ կքննարկենք, բայց շահառուները պետք է չորեքշաբթի օրվանից ստանան ֆինանսները, կլինի դա սոցիալական, թե բիզնես աջակցություն»,- այսօր կառավարության նիստում հայտարարեց  վարչապետ Նիկոլ Փաշինյանը և հավելեց. «Բայց կառավարության հաջորդ նիստում մենք պետք է աշխատենք նաև նոր փաթեթեներ ունենալ, որոնցով այլ խմբեր կընդգրկվեն և այլ ծրագրեր կիրականացվեն այնքան, մինչև համոզվենք, որ ճգնաժամի շոկային փուլն հաղթահարված է և անցնենք ավելի կոնկրետ զարմացման… զարգացման հայեցակարգերի քննարկմանը»:

Էկոնոմիկայի նախարար Տիգրան Խաչատրյանը, ներկայացնելով կորոնավիրուսի տնտեսական հետևանքների չեզոքացման առաջին միջոցառումը՝ շեշտեց, որ այն վերաբերում է վերջին մեկ տարվա ընթացքում Հայաստանում գործող բոլոր իրավաբանական  անձանց և անհատ ձեռնարկատերերին՝ անկախ գործունեության ոլորտից: Ըստ նախարարի, այդ գործիքից չեն կարող օգտվել բանկերը, վարկային կազմակերպությունները, գրավատները  և ապահովագրական կազմակերպությունները: Վարչապետն առաջարկեց դրանցում ընդգրկել նաև խաղատները, ինչն անմիջապես ընդունվեց: 

Նկատելով, որ դիմորդների համար կա մեկ պայման , որ նրանք պետք է ունենան վարկային  և հարկային բարվոք պատմություն, նախարարը տեղեկացրեց. «Նրանք կարող են դիմել բանկային և վարկային համակարգի միջոցով: Ընտրությունը, ֆիլտրումը կատարում է ֆինանսական համակարգի միջոցով: Երբ ֆինանսական կազմակերպությունը  դրական որոշում է կայացնում, ապա  առավելագույն օժանդակության չափը կարող է լինել 500 մլն դրամ»:

Այս գործիքով ֆինանսավորումը կարող է կազմակերպվել եթե կազմակերպությունն այն վերցնում է, որպեսզի վճարի աշխատակիցների երեք ամիսների աշխատավարձը (բայց ոչ ավել քան յուրաքանչյուր աշխատակցի հմար 500 հազար դրամ) և պետական կամ համայնքի բյուջեի հարկերի, տուրքերի և պարտադիր վճարների վճարումները իրականացնելու համար:

Կֆինանսավորվի նաև հումքի գնում կամ ներմուծումը,պայմանով, որ հումքի ողջ ծավալը պետք է օգտագործվի Հայաստանում՝ պատրաստի արտադրանք ստանալու նպատակով և տնտեսավարողը տնօրինում է անհրաժեշտ և համապատասխան արտադրական հզորություններ, սարքերի և սարքավորումների ներմուծումը, պայմանով, որ տվյալ սարքերը և սարքավորումները պետք է օգտագործվեն Հայաստանում արտադրություն կազմակերպելու կամ արտադրությունն ընդլայնելու նպատակով (այսուհետ՝ սարքավորումների վարկեր), հանրային ծառայությունների վճարումները (էլեկտրաէներգիայի, ջրի, գազի, կապի և հեռահաղորդակցության գծով ծախսերի իրականացում, բայց յուրաքանչյուր ծառայության դեպքում ոչ ավել, քան ամսական 5 000 000 ՀՀ դրամ գումարի չափով՝առավելագույնը երեք ամսվա համար, առևտրով զբաղվող ընկերությունների կողմից սննդի ներմուծումը, պայմանով, որ գնված կամ ներմուծված ապրանքը պետք է իրացվի Հայաստանում:

Տիգրան Խաչատրյանը նշեց, որ օժանդակությունը տրամադրվում է տնտեսվարողներին՝  ՀՀ տարածքում գործող և լիցենզավորված բանկերից կամ վարկային կազմակերպություններից ստացվող նպատակային վարկերի համաֆինանսավորման, վերաֆինանսավորման և տոկոսադրույքի սուբսիդավորման ձևով:

Նախարարը նկատեց, որ յուրաքանչյուր տնտեսավարողի համար կիրառելի է օժանդակության ձևերից միայն մեկը և հավելեց. «Եթե վարկը ներ է գրավվում աշխատավարձերը վճարելու համար՝ կառավարությունը համաֆինանսավորում է բոլոր տոկոսային ծախսերը: Հարկային պարտականությունները կատարելու համար էլ բոլոր տոկոսները կսուբսիդավորվեն: Հումքի ձեռքբերման համան 6 տոկոսը կսուբսիդավորվի, կոմունալ վճարների դեպքում՝ 10 տոկոսը, սարքավորումների համար՝ 5 տոկոսային կետը և  սննդամթերքի ներկրմամբ զբաղվող սուբյեկտի վարկի՝ մինչև 8 տոկոսը»:

Նախարարը եզրափակեց իր խոսքը՝ տեղեկացնելով, որ գործիքի գործողության ժամկետը մինչև 24 ամիս է: