Ձեր վստահելի աղբյուրը

Հայկական միասնական տեղեկատվական կենտրոնում հրավիրված ասուլիսում էկոնոմիկայի նախարարի տեղակալներին հարց ուղղվեց, թե ճանապարհների պատճառով գյուղացին չի կարողանում իր արտադրանքն արտահանել, ի՞նչ քայլեր են արվում նրանց աջակցելու համար:

Նախարարի տեղակալ Արման Խոջոյանը նկատեց. «Ջերմատնային տնտեսությունները հարց են բարձրացնում, որ շուկաների հասանելիության խնդրի առաջ են կանգնած: Բայց մենք տեսնում ենք, որ նախորդ տարիներին այս սեզոնին լոլիկի վաճառքի գինը 750 դրամ էր, իսկ այսօր՝ 1300 է: Դա պայմանավորված է նաև նրանով, որ ինչ-որ չափով սահմանափակվել է ներկրումը: Դժգոհում են, որ արտահանումն է սահմանափակվել, բայց նաև ներկրման սահմանափակումները ստեղծում են հնարավորություն, որպեսզի մարդիկ կարողանան տեղական շուկայում իրացնեն ապրանքը»:

Էկոնոմիկայի  փոխնախարար Տիգրան Գաբիրելյանը նշեց, որ ստեղծված իրավիճակում վերամշակող ընկերությունները կարող են 1.5 տարով վերցնել մինչև 1.8 մլրդ դրամի վարկերը և վերամշակեն տեղական արտադրության գյուղմթերքը:

Էկոնոմիկայի նախարարի մամուլի խոսնակ Աննա Օհանյանն ասաց, որ Հայաստանում ներկրման սահմանափակումներ չկա, և այս պահին սահմանափակվել է միայն Իրանից ներկրումները, որի մասնաբաժնում գյուղմթերք չի եղել, իսկ Վրաստանի սահմանով մթերքների բեռնափոխադրումը շարունակվում է:

Անդրադառնալով գյուղատնտեսական կոոպերատիվների ստեղծման գործընթացի խթանմանը՝ փոխնախարար Արման Խոջոյանը  հայտարարեց, որ նրանց կողմից վարկեր վերցնելու դեպքում պետությունը  50-70 տոկոսով կհամաֆինանսավորի  բանկերի ռիսկերը:

Ներկայացնելով գյուղատնտեսության ոլորտի ապահովագրման հեռանկարները՝ փոխնախարար Տիգրան Գաբրիելյանը էլ նշեց, որ այս տարի 523 ապահովագրական պայմանագիր է կնքվել և համոզմունք հայտնեց, որ հետագա տարիներին ապահովագրվող տեսակների ավելցման հաշվին այդ թվերը կբազմապատկվեն:

Փոխնախարարները նախատեսում են  հասնել գյուղոլորտի ամբողջական ապահովագրման: