Ձեր վստահելի աղբյուրը

«Մինչև օրս կորոնավիրուսով վարակված հղիների շրջանում ծանր կամ մահվան դեպքեր հայտնի չեն»,- ասուլիսում ասաց առողջապահության նախարար Արսեն Թորոսյանը։

Նա նշեց, որ հղիության ժամանակ դիմադրողականությունը նվազում է, իսկ այս հիվանդության սպեցիֆիկաներից մեկն այն է, որ իմունիտետի գերգրգռվածություն է լինում,  որը վնասում է  սեփական թոքի բջիջները։

«Քլորոքվին դեղամիջոցի ազդեցության մեխանիզմներից մեկը հենց իմունիտետը ճնշելն է, նաև օգնում է, որ թոքի հյուսվածքն արագ չվնասվի մեր իսկ իմունիտետի պատճառով», - ասաց նախարարը։

Ինչ վերաբերում է պտղի վրա ազդեցությանը, Ա.Թորոսյանն ասաց, որ վաղ է դրա մասին խոսել, որովհետև վարակը հայտնաբերվել է դեկտեմբերի վերջին, փաստորեն 3 ամիս էլ դեռ ամբողջությամբ չի անցել վիրուսի շրջանառության ընթացքում մարդկային պոպուլյացիայում, և դժվար է ասել, թե պղտի կամ ընդհանրապես հետագա ուշացած հետևանքների առումով ինչ ազդեցություն է թողելու մարդկանց վրա։

«Տարբեր բաներ կան նկարագրված, որ բարդ դեպքերում թոքերի օգտակար ծավալը փոքրանում է, մարդիկ հնարավոր է շնչառության հետ կապված խնդիրներ ունենան։ Դա չեմ բացառում, հատկապես տարիքով և ռիսկի խմբում գտնվող անձանց մոտ։ Նկարագրված հազարավոր դեպքեր կան, երբ կարճ ժամանակահատվածում  բուժված քաղաքացիների մոտ առողջական լուրջ  կամ նկատելի խնդիր չի արձանագրվում։ Բայց պետք են երկարատև, տարիներով հետազոտություններ վերջնական այդ հարցերին պատասխանելու համար»,- նշեց նախարարը։

Հարցին՝ կանխատեսում ունե՞ք, թե երբ Հայաստանում, արտակարգ դրության պայմաններում, կորոնավիրուսը կհասնի իր պիկին ու կսկսի թուլանալ, առողջապահության նախարարն ասաց, որ չունեն նման կանխատեսում, տեսնում են մոտավորապես աճի տեմպը, հույս ունեն, որ եթե նույնիսկ այս աճի տեմպը պահպանվի, բարենպաստ աճի տեմպ է, փոքր տոկոսով է աճում ամեն օր, ինչն արդյունք է իրենց հետաքննությունների, մեծաթիվ մեկուսացումների։

«Հույս ունենք, որ այս ամբողջական տեղաշարժերի սահմանափակումներն այս յոթ օրերի ընթացքում, միգուցե դրանից հետո, նպաստելու են այդ թվերի աճի զսպմանը։ Այլ գործոններ էլ կան. չենք մոռանում եղանակի մասին, որը, կարծես, մեզ մի քիչ էլ «քաշում է», ուշ է տաքանում, լավ կլիներ, շուտ տաքանար, որովհետև ազատ, տաք  միջավայրում վիրուսը երկար չի դիմանում։ Փորձելու ենք մեծ պիկ չունենանք, որովհետև եթե ունենանք մեծ պիկ, ինչպես Իտալիայում, Իրանում, աղետալի պիկեր են լինելու երկրի համար թե առողջապահական, թե ընդհանրապես հումանիտար առումով։ Բոլորի պարտքն է այդ պիկը թույլ չտալը»,- ասաց Արսեն Թորոսյանը։