Ձեր վստահելի աղբյուրը

«Արցախում ևս պետք է արտակարգ իրավիճակ հայտարարվի, որովհետև եթե Հայաստանում դա գործում է, Արցախում ևս պետք է լինի»,- այսօր լրագրողների հետ զրույցում ասաց ՀՀ դեմոկրատական կուսակցության նախագահ Արամ Գասպարի Սարգսյանը՝ անդրադառնալով Արցախում մարտի 31-ին անցկացվելիք նախագահական  ընտրություններին։

Սարգսյանը նշեց՝ իր համար անհասկանալի է, ինչու են համառորեն ցանկանում հիմա անցկացնել Արցախի նախագահական ընտրությունները։

«Եթե Հայաստանի իշխանությունների համար կենսական նշանակություն ունեցող սահմանադրական փոփոխությունների հանրաքվեն հետաձգվեց, ապա ինչու չի կարելի հետաձգել նաև Արցախի նախագահական ընտրությունները, հատկապես, որ այնտեղ վիրուսի տարածման վտանգ ևս կա։ Ընտրությունների օրինական լինելու համար այնտեղ պետք է լինեն միջազգային դիտորդներ, իսկ եթե նրանք լինեն, ապա որևէ երաշխիք չկա, որ Արցախում չի տարածվի կորոնավիրուսը։ Եվ եթե ընտրությունների երկրորդ փուլ լինի, իսկ դա ամենայն հավանականությամբ կլինի, ապա այդ գործընթացը ևս երկու շաբաթ կձգվի»,- նշեց Սարգսյանը։

Ըստ նրա, Հայաստանի և Արցախի իշխանությունները, չգիտես ինչու, շահագրգռված են Արցախում ընտրությունների անցկացմամբ։ Սարգսյանի համար անհասկանալի է նաև Արցախի գործող նախագահ Բակո Սահակյանի կեցվածքը, քանի որ ինքը բոլոր հնարավորություններն ունի երկիրը առնվազն 6 ամիս կառավարելու.

«Իսկ դա անհրաժեշտ է, որ այս պանդեմիան մասամբ վերանա։ Բացի այն, որ վարակի տարածման վտանգ կա, հնարավոր է նաև, որ ընտրապայքարում լարվածությունը սրվի և ընտրությունների երկրորդ փուլ լինի։ Դա սովորական ընտրական մթնոլորտ է, երբ մրցակիցներն իրենց շահերն են առաջ մղում և շփվում բնակչության հետ։ Եվ հատկապես, Արցախում չկա լաբորատորիա, և պարզ չէ՝ թեստավորում եղել է, թե ոչ։ Ես վստահ եմ՝ ընտրությունները չհետաձգելը քաղաքական դրդապատճառ ունի»։

Սարգսյանը վստահեցրեց՝  Արցախի նախագահական ընտրությունները հետաձգելն անհրաժեշտություն է։ Նրա խոսքով, եթե անգամ լաբորատորիաներ լինեին Արցախում, ապա այդ դեպքում էլ պետք է ընտրությունները հետաձգվեին, քանի որ խոսքը ոչ միայն նախագահական, այլ նաև խորհրդարանական ընտրությունների մասին է։

«Եթե ոչ, ապա իշխանություններն ի՞նչ պատասխան են տալու, երբ վարակը տարածվի նաև Արցախում, այն էլ պայմաններում, որ Ադրբեջանն ամեն պահ սպասում է Արցախում ֆորս մաժորային իրավիճակ լինելուն»,- շեշտեց Սարգսյանը։

«Ռեֆորմիստներ» կուսակցության հիմադիր Վահան Բաբայանն էլ նշեց, որ Արցախի նախագահի թեկնածուները նույն համառությունն են ցուցաբերում, ինչ Հայաստնի իշխանությունը՝ նախքան արտակարգ դրության ռեժիմի հաստատումը։

«Չի բացառվում, որ Բակո Սահակյանն էլ նույն համառությամբ ցանկանում է պահպանել հասարակական կայունությունը, և մտահոգություն ունի պահպանել ընտրական պրոցեսը։ Բայց այդ պրոցեսը շատ վտանգավոր է վիրուսի տարածման տեսնկյունից։ Սա քաղաքական խնդիր չէ, քանի որ Արցախը փոքր պետություն է, և իրեն միջազգային կառույցներից չեն կարող որևէ բան պարտադրել։ Եվ Հայաստանի իշխանությունը՝ որպես Արցախի անվտանգության երաշխավոր, պարտավոր էր այնտեղ լաբորատորիաներ կառուցել։ Հունվար ամսից ի վեր դժվար չէր Արցախում մեկ հակահամաճարակային կենտրոն կառուցելը, դա չարեցին, հիմա էլ չեն անում։ Հիմա դրա համար, այս ամենը հաշվի առնելով, այո, Արցախում պետք է արտակարգ դրություն հայտարարվի»,- ասաց Բաբայանը։

Արամ Սարգսյանն էլ վստահեցրեց՝ հերոսաբար հայտարարողները, որ Արցախում որևէ խնդիր չկա և պետք է ընտրություններն անցկացվեն, պատասխան են տալու. «Զգուշացնում եմ, պատախան եք տալու։ Սա լուրջ խնդիր է, եթե ամբողջ աշխարհն է այսքան մտահոգված, բոլորը մեկուսանում են, գլուխ գովել, որ Արցախում վիրուս չկա, նորմալ չէ։ Ի՞նչ պատահեց, հիմա էս մեր կղզյա՞կն է մնացել հպարտ։ Արցախին վտանգի տակ դնողն իսկապես կլինի ամենամեծ հանցագործը»։