Ձեր վստահելի աղբյուրը

«Կառավարության շատ անդամներ կողմ են, որ գյուղատնտեսության նախարարությունը վերականգնվի, կարծում եմ՝ Նիկոլ Փաշինյանն էլ է եկել այն գաղափարին, որ նախարարությունը փակելը մեծագույն սխալ էր»,- այսօր լրագրողների հետ զրույցում ասաց «Ագրարագյուղացիական միավորում» ՀԿ ղեկավար Հրաչ Բերբերյանը։

Անդրադառնալով վարչապետ Փաշինյանի օրերս արած հայտարարությանը, թե գյուղատնտեսությանը պետք է խթանել և այն դարձնել տնտեսության կարևորագույն ոլորտներից մեկը՝ Բերբերյանը նշեց, որ այդ հայտարարությունը լույս է թունելի վերջում։

«Բայց պարզ չի՝ հացազգիների աճը խթանելու ենք, թե չէ, կամ որ կուլտուրաների արտահանումն ենք խթանելու։ Թե կֆինանսավորվի տրանսպորտային մի կազմակերպություն, որ գյուղամթերք է արտահանում։ Կամ եթե մի պահածոյագործի են ֆինանսավորելու, դա գյուղատնտեսության խթանում չի։ Իսկ բանկերը կգնան դրան, և ոչ թե գյուղացուն կֆինանսավորեն, այլ որոշ կազմակերպությունների։ Էլ չեմ ասում էն բանկային խայտառակ ցուցակները, որոնցով որոշվում է՝ որ գյուղացուն վարկ տալ, որին՝ չտալ»,- նշեց Բերբերյանը։

Նա տեղեկացրեց, որ իրենք դժգոհ են էկոնոմիկայի նախարարի առաջարկից՝ աջակցություն կստանան կոոպերացիաները. «Ինչո՞ւ կոոպերացիա, ֆերմերային միավորումներ թող լինեին։ Իսկ այս դեպքում ֆերմերային միավորումը եթե գնա ու ներկայացնի իր ծրագիրը, որ, օրինակ, ուզում է ցորենի սերմ ներկրել, պիտի ասեն, կոոպերացիա դարձեք, որ ֆինանսավորեմ։ Իսկ հիմա էլի կոոպերացիաներ կստեղծվեն, գումարը կստանան ու կանհետանան, կլուծարվեն, բայց էֆեկտիվ աշխատանք չեն ունենա։ Դրա համար եմ ասում՝ մասնագետներ են պետք, իսկ այսօր մեր կառավարությունը մասնագետներ չունի։ Վարչապետի կողքին պտտվողները ընդամենը դատարկագլուխներ են»։

Ըստ բանախոսի, արտակարգ իրավիճակը ցույց տվեց՝ ինչ կարևորություն ունի գյուղատնտեսությունը երկրի համար, քանի որ բոլորն էլ ուտել ուզում են։

Նա նշեց, որ նախորդ տարի կարտոֆիլի ցանքատարածքները 30%-ով պակասել են, իսկ այս տարի դրությունն ավելի ծանր է։

«2019 թվականին ԱԺ-ն՝ Սևանի դատարանը փակող պատգամավորի անձնական բիզնեսը խթանելու համար, որոշել է գարու, ցորենի և կարտոֆիլի սերմ ներկրող ֆերմերային ասոցիացիաների փոխարեն առևտրային կազմակերպություններին ԱԱՀ-ից ազատել։ Առաջ ֆերմերին էին ազատում այս հարկից, քանի որ նա սերմը բերում էր իր համար, այլ ոչ վաճառքի, իսկ հիմա առևտրային կազմակերպություններին են ազատում, և երբ ֆերմերը մտնում է մաքսատուն, իրեն ասում են՝ դու իրավունք չունես ապրանքը մաքսազերծելու, ասում են՝ գնա առևտրային կազմակերպություն դարձի, արի։ Ֆերմերն էլ գնում է, դառնում առևտրային կազմակերպություն, հարկայինն էլ գալիս է 27% հարկ դնում ֆերմերի վզին։ Այդ օրենքով ազատ մրցակցությունը շպրտել են դուրս, մտցրել են մոնոպոլ կաղապար, որ մենակ իրենք ներկրեն»,- ներկայացրեց Բերբերյանը։

Նա տեղեկացրեց, որ 2019 թվականի հունիսի 25-ի ԱԺ գաղտնի ընդունած օրենքի համար դատարան է դիմելու՝ պաշտոնեական դիրքի չարաշահման հոդվածով.

«Տեսեք, մի կողմից կառավարությունը փորձում է բաց, թափանցիկ քաղաքականություն վարել, մյուս կողմից էլ իշխանական կուսակցության անդամներից մեկն իր անձնական շահերն է առաջ քաշում։ Գոնե քննարկում լիներ»։

Բանախոսը նաև ահազանգեց՝ այսօր ցորենի սերմացու չկա, որ գյուղացին ցանի։

«Մենք Արցախի ֆերմերներին մոտ 100 հեկտար սոխի սերմով օգնեցինք, բայց այդքանի համար մոտ 3000-4000 եվրո հարկ է մուծել գյուղացին։ Կարելի՞ ա։ Փոխարեն գյուղացուն սուբսիդավորեն, որ բերի ցանի, հարկում են։ Երբ մենք ցորեի սերմացուն հարկերից ազատեցինք, 20-30 %-ով ցանքատարածքներն ավելացան։ Իսկ հիմա գյուղացին վախենում է աշխատել, մտածում է՝ ավելի լավ է ցանեմ այնքան, ինչքան ինձ է պետք։ Նույնը կարտոֆիլի մասին կարող ենք ասել։ Հիմա ամեն ինչ անում ենք, որ էլիտար դասի 750 տոննա սերմ բերենք Հայաստան։ Ամեն ինչ անում են, որ սերմի գինը 27%-ով թանկանա»,- եզրափակեց խոսքը Բերբերյանը։