Ձեր վստահելի աղբյուրը

Կառավարության այսօրվա  նիստում հաստատվել է 3 միջոցառում, մոտ ժամանակներում կիմպլիմենտացվեն, ապրիլի 1,2,9 վերջնաժամկետներով։ Լրագրողների հետ հանդիպմանն ասաց փոխվարչապետ Մհեր Գրիգորյանը։

Նա նշեց, որ այսօրվա լրամշակումներով միջոցառումների  վերաբերյալ որոշումները հրապարակելուց հետո կունենան 8 հաստատված միջոցառումներ, որից 4-ն ունեն  սոցիալական բնույթ, 4-ը՝ տնտեսությանն անհրաժեշտ օժանդակություն ցուցաբերելու բնույթ։

Փոխվարչապետի ներկայացմամբ, առաջին միջոցառմամբ թիրախավորում են ծախսի նպատակը, ոչ թե ոլորտը,  համարում են, որ այս փուլում հնարավոր է լինի իրավիճակ, որ տնտեսավարողն անհրաժեշտության ունենա միջոցներ ներգրավել վարկերի տեսքով, իրականացնել հումքի, սարքավարումների, աշխատավարձի, հարկերի վճարման հետ կապված ծախսեր։ Նա ասաց, որ երեք գործիք են նախատեսում՝ համաֆինանսավորում, վերաֆինանսավորում, տոկոսադրույքի սուբսիդավորում. «Այսինքն եթե վերածենք պրակտիկ իրականության, երեք գործիքները լուծում են այն հնարավոր դասական պրոբլեմները, որոնք այսօր կարող են ի հայտ գալ՝ արտարժույթի ռիսկ, տոկոսադրույքի բարձր լինել, գրավի կամ պարտավորության կատարման միջոցի նվազ լինել։
Երկրորդ միջոցառման նպատակն է օժանդակել գյուղատնտեսական ոլորտի ձեռնարկութուններին, անհատներին, որոնք դրամական միջոցներ ներգրավելու խնդիր ունեն։

Երրորդ միջոցառումը ոլորտային թիրախ ունի. «Առաջին երկու միջոցառումներն  իրականացվելու են բանկային համակարգի ենթակառուցվածքի միջոցով՝ ներգրավելով  վարկային համակարգը, որովհետև ենթադրում ենք մասսայականություն, ցանկություն ունենք գործիքի տարածումը մասսայական լինի, հասանելի բոլորին, կամ ցանկացածին»։

Չորրորդը սոցիալական բնույթի է, օժանդակություն են տրամադրում այն ընտանիքներին, որոնք ունենք մինչև 14 տարեկան երեխա, բայց զրկվել են աշխատանից։ 5-րդ միջոցառման նպատակը երկակի է՝  դրամաշնորհ են տրամադրում մասնավոր կառույցներին, որոնք հունվարի 1-ից մարտի 25-ը ժամանահատվածում իրենց աշխատողների թիվը, նաև աշխատանքային ֆոնդը չեն նվազեցրել։
Վեցերորդ գործիքն ունի սոցիալական բնույթ, միտված է օժանդակել այն քաղաքացիներին, որոնք կորցրել են աշխատանքը մարտի 13-30-ն ընկած ժամանակահատվածում։ Օժանդակության չափը պայմանավորել են նվազագույն աշխատավարձի չափը՝ 68 հազար դրամ յուրաքանչյուր աշխատանք կորցրած անձի համար։

Յոթերորդ գործիքը նույնպես սոցիալական է, վերաբերում է հղի կանանց, մասնավորապես հղի կինը, որի ամուսինը կորցրել է աշխատանքը մարտի 13-30-ն ընկած ժամանակահատվածում կամ միայանակ հղի կինը, օժանդակության չափը սահմանվել է 100 հազար դրամ։

«Խոսում ենք միանգամյա օժանդակության մասին։ Իրավիճակից ելնելով, կարծում եմ, նախ նոր միջոցառումներ կլինեն կամ  կճշգրտվեն միջոցառումներն  այն նպատակով, որպեսզի թիրախներն ավելի հստակ լինեն, միջոցներն ավելի արդյունավետ ծախսվեն»,- ասաց Մ.Գրիգորյանը։
Փոխվարչապետի ներկայացմամբ, ութերորդ գործիքը ոլորտային սոցիալական գործիք է, կվերաբերի այն ոլորտներին՝ հյուրանոցային, հյուրատնային ծառայություններ, հանրային սնունդի ծառայություններ, զբոսաշրջության ոլորտ, վարսավիրանոցների ու գեղեցկության սրահների ծառայություններ,  ոչ սննդի, ոչ ալկոհոլային ապրանքների ու ծխախոտի մանրածախ առևտուր, որը կազմակերպվում է ինքնուրույն կամ առևրի կենտրոններում, որոնք հիմա աշխատում են, ուղղակի հաշվի առնելով իրավիճակը, կարելի է համարել ժամանակավոր տուժածներ։ Այդ ոլորտների աշխատակիցներին կտրամադրվի տարբեր չափերի օժանդակություններ։

Հարցին, թե կառավարությունն արդեն կորոնավիրուսի տնտեսական հետևանքների չեզոքացման ութ միջոցառում է հաստատել, մոտավորապես քանի՞ շահառուի մասին է խոսքը, Մ. Գրիգորյանն ասաց, որ սոցիալական գործիքներից ամենաշատ շահառու ունեցողը ութերորդն է, շահառուների թիվը գերազանցում է 100 հազարը։ Նա նշեց, որ առաջին ու երկրորդ գործիքների շահառուների թիվը հիմա դժվար կլինի հայտնել, բայց ենթադրում են, իհարկե, մասսայականություն։ Նույնը վերաբերում է  նաև գյուղատնտեսական ոլորտին։ Երրորդ միջոցառման շահառուների թիվը՝ ՓՄՁ հատվածի որոշ խումբ է, բայց, ըստ փոխվարչապետի, ճիշտ կլինի պոտենցիալ շահառուների քանակը հրապարակել երկու-երեք շաբաթից։

«Մոտավորապես, սոցիալական գործիքների շահառուների համախառն թիվը կլինի 100 հազարից ավելի, իսկ տնտեսական գործիքների շահառուների՝ կհրապարակվի մոնիթորինգից հետո»,- ասաց Մ.Գրիգորյանը։