Ձեր վստահելի աղբյուրը

Ֆրանսիայի ներքին գործերի նախարարը հայտարարել է, որ երկրում ընտանեկան բռնության մասին հաղորդումները աճել են ավելի քան 30%-ով այն բանից հետո, երբ երկիրը հայտնվեց փակման մեջ մարտի 17-ից: Այս մասին գրում է Euronews-ը։

Քրիստոֆ Կաստաները նշել է, որ միայն Փարիզում դեպքերը աճել են 36%-ով:

Ֆրանսիայի հակակոռնավիրուսային արգելափակումը մարդկանց ստիպել է վերջին 13 օրերին մնալ տանը: Կարանտինն այժմ երկարացվել է մինչև ապրիլի 15-ը:

Բռնարար զուգընկերների հետ տանը փակված լինելը մեծացրել է զոհերի ռիսկը:

Նշվում է, որ Ֆրանսիան արդեն ունի Եվրոպայում ընտանեկան բռնության ամենաբարձր ցուցանիշներից մեկը: Գնահատվում է, որ ամեն տարի 189,000 կին, 18-ից 75 տարեկան, ներկայիս կամ նախկին զուգընկերների կողմից ֆիզիկական կամ սեռական բռնության է ենթարկվում, բայց դրա մասին հայտնում է միայն 20%-ը:

Պաշտոնական թվերի համաձայն, մեկ կին յուրաքանչյուր երեք օրվա ընթացքում սպանվում է զուգընկերոջ կամ նախկին զուգընկերոջ կողմից:

Կաստաները նշել է, որ կառավարությունը կներդնի նոր միջոցներ, որպեսզի բռնության ենթարկված անձինք դիմեն օգնության կարանտինի ժամանակ:

Նախարարը նշել է, որ տուժածները կկարողանան օգնություն դիմել դեղատներում:

«Կինը, որը տառապում է ընտանեկան բռնությունից, կարող է գնալ դեղատուն և այնտեղից օգնության դիմել»,-ասել է Կաստաները։

Նա ավելացրեց, որ ընտանեկան բռնության զոհերի համար կկազմվի ծածկագիր համակարգ, որոնց զուգընկերները նրանց ուղեկցում են դեղատուն։

Ընտանեկան բռնության հաղորդման համար Իսպանիան արդեն ունի կոդային համակարգ:

Քաստաները նշել է, որ, քանի որ շարունակվում է կարանտինը, ոստիկանությունը մեծ զգոնություն պետք է ցուցաբերի ընտանեկան բռնության նկատմամբ, որն առաջնային խնդիր է։