Ձեր վստահելի աղբյուրը

«Ինֆորմացիայի ազատության կենտրոն» ՀԿ հիմնադիր նախագահ Շուշան Դոյդոյանը, որ նախկինում զբաղեցրել է  ԱՆ Անձնական տվյալների պաշտպանության գործակալության պետի պաշտոնը, մի քանի հարցեր է հրապարակել, ԱԺ-ում  քննարկվող նախագծի վերաբերյալ, որոնք հիմնավորված պատասխաններ են պահանջում։

Նա իր ֆեյսբուքյան էջում գրել է.

«Մի քանի հարց, որ կառաջարկեի պատգամավորներին տալ Կառավարությանը Անձնական տվյալներին առնչվող օրինագիծը քննարկելիս.

1.  Կոնկրետ ո՞ր մարմիններն են ունենալու մուտք մշակված անձնական տվյալներին։ Ընդ որում, այդ մարմինների ցանկը պետք է սահմանված լինի օրենքով, ոչ թե կառավարության որոշմամբ, ինչպես նախատեսում է այս նախագիծը։

2. Նախագիծը սահմանում է, որ մշակված անձնական տվյալները պահվելու են մեկ ամիս։ Սա շաաատ երկար ժամկետ է և  չհիվնավորված։ Պետք է սահմանվի առավելագույնը 3-օրյա ժամկետ տվյալները ոչնչացնելու համար։

3. Անվտանգության ի՞նչ մեխանիզմներով ու միջոցներով են ապահովելու, որ բացառվեն անձնական տվյալների արտահոսքերը, ինչպես նաեւ երրորդ անձանց մուտքը այդ տվյալներին։

4.  Ո՞րտեղ են պահվելու անձնական տվյալները։

5. Եվ ամենաառանցքայինը գուցե այն է, որ բացակայում է կապը մշակվող անձնական տվյալների և սահմանված նպատակի միջեւ։

Այս հարցերը կոնկրետ և հիմնավորված պատասխաններ են պահանջում այս օրինագիծն ընդունելուց առաջ»։

Դոյդոյանն այս գրառումը կատարելիս նշել է մի քանի պատգամավորների։ Նրանցից ԱԺ «Լուսավոր Հայաստան» խմբակցության ղեկավար Էդմոն Մարուքյանն արձագանքել է. «Տվեցինք, բայց մեջն ի՞նչ... Դիտեք պատասխանները... բազմաթիվ հարցեր ու մտահոգություններ մնացին չպատասխանված և չփարատված»։

Իշխանական «Իմ քայլը» խմբակցության պատգամավոր Գայանե Աբրահամյանն էլ  նշել է, ինքը հիվանդ լինելու պատճառով նիստին չի մասնակվում, բայց. «այս հարցերի մեծ մասը հնչել են, կարծում եմ այս նախագիծը կփոփոխվի, քանի որ շատ բաներ մեզ համար ևս խնդրահարույց են»։