«Այսինքն, ընդդիմության ձայներով էիք ուզում, որ ձեր օրենքն ընդունվի, որին ընդդիմությունը դեմ էր». Էդմոն Մարուքյան
«Դուք որ հարցադրում եք անում՝ ի՞նչ եք արել: Այսինքն, դուք ակնկալում եք, որ մենք պետք է ասենք, թե ինչ ենք արել: Մենք բոլորս պետք է օգնենք, որ ժողովուրդն այս վիճակից շուտ դուրս գա, բայց եթե պետք է բարձրաձայնենք դրա մասին՝ ես չեմ կարծում, որ դա ճիշտ է»,- արձագանքեց «Բարգավաճ Հայաստան» խմբակցության պատգամավոր Սերգեյ Բագրատյանը «Իմ քայլը» խմբակցության անդամ Նազելի Բաղդասարյանի ելույթին:
«Արտակարգ դրության իրավական ռեժիմի մասին ՀՀ օրենքում լրացումներ կատարելու մասին» և «Էլեկտրոնային հաղորդակցության մասին ՀՀ օրենքում լրացում կատարելու մասին» օրենքներում փոփոխություն կակտարելու մասին նախագծերի քննարկման ժամանակ Բաղդասարյաը հայտարարել էր. «Մենք փաստել ենք, որ օրինագիծն ուներ բազմաթիվ խութեր և մենք միջոցներ ենք ձեռնարկել այդ խութերն շտկելու համար: Թե ինչ չափով ենք շտկել՝ լրամշակված օրինագծում տեսնում եք: Իսկ ի՞նչ եք արել դուք: Ունեիք հնարավորություն առաջարկ ներկայացնելու: Ներկայացրե՞լ եք՝ ոչ : Ի՞նչ եք արել, որ այս վատ, շատ վատ խայտառակ օրենքը փոփոխվի: Ի՞նչ եք արել դուք, հարգելի «Բարգավաճ Հայաստան» և «Լուսավոր Հայաստան» խմբակցությունների մեր գործընկերներ: Ես հասկանում եմ, որ եկել է այն ժամանակը, որ պետք է մտածել՝ ճառ ասել, թե զանգ կախել: Հա, զանգ կախելը դժվար է՝ հատկապես վախի մթնոլորտում: Ո՞ւր էին ձեր խմբակցության անդամները հանձնաժողովի նիստում: Հարգելի հայրենակիցներ, ուզում եմ ասել, որ օրենսդրական գործունեությունը բացի ճառ ասելուց նաև օրենսդրական գործունեություն է: Այս նախագծի շուրջ ընդդիմության գործունեության արդյունավետությունը եղել է 0»:
«Այսօր քաղաքական խնդիրների հարց չէ: Այսօր գոյության խնդիր է, այսօր մենք պետք է իրար օգնենք, որ չհոգնենք, կարողանանք դուրս գալ այս իրավիճակից: Մեկ անգամ ևս կարևորենք, որ եթե հավաքվելու ենք ապա հավաքվենք խիստ կարևոր հարցերի շուրջ: Ես գտնում եմ, որ այս օրակարգով չպետք է ԱԺ-ն հավաքվեր: Սա կառավարության և պարետի որոշումների տիրույթում էր և խնդրելու եմ ԱԺ ղեկավարությանը՝ նման հարցերն ավելի օպերատիվ լուծել: Արտակարգ իրավիճակի պայմաններում, այո այդ իրավունքները կան: Ճիշտ նշվեց, որ այսօր իրավաբանություն կարդալու ժամանակները չէ: Եթե նույնիսկ Սահմանադրությունը ինչ-որ բան արգելում է , բայց մենք մարդու կյանք պետք է փրկենք՝ մենք պետք է անցնենք այդ օրենքի վրայով»,- արձագանքելով Բաղդասարյանին՝ հայտարարեց Սերգեյ Բագրատյանը:
Նախագծի քվեարկությունից առաջ Էդմոն Մարուքյանը նկատեց, որ իշխող խմբակցությունը դահլիճում չունի բավարար թվով ձայներ օրինագիծն ընդունելու համար և ընդդիմությանը կոչ արեց չմասնակցել քվեարկությանը:Արման Բաբաջանյանն էլ ընդդիմադիրներին կոչ արեց կողմ քվեարկել:
Վարման կարգով ելույթ ունենալով՝ Լիլիթ Մակունցը կողմ քվեարկելու կոչ ուղղեց ընդդիմադիրներին. «Ես ընդունում եմ ընդդիմության՝ միասնականությամբ գործելու կոչերը և հույս հայտնում, որ այդ կոչերը կվերածվեն գործի: Անհրաժեշտ է, որ ձեռնարկվեն արտակարգ միջոցառումներ՝ կանխելու վիրուսի տարածումը և կյանքեր փրկելու համար»:
«Իմ քայլը» խմբակցության մեկ այլ պատգամավոր Ծովինար Վարդանյանն էլ հայտարարեց. «Այսպիսի ասացվածք կա՝ «Էծի պարը կամրջին է բռնում»: Հարգելի ընդդիմություն, ես չեմ կարծում, որ սա այն պահն է, որ ճարպկություն ցուցաբերենք և արկածախնդրությամբ զբաղվենք»:
Ընդդիմությունը չմասնակցեց քվեարկությանը և «Էլեկտրոնային հաղորդակցության մասին ՀՀ օրենքում լրացում կատարելու մասին» օրենքի նախագիծը չընդունվեց՝ ստանալով անբավարար՝ 65 կողմ ձայն:
Քվեարկությունից հետո Լիլիթ Մակունցը դիմեց բնակչությանը և հայտարարեց, որ ընդդիմությունը իր կրավորական կեցվածքով նպաստում է նրան, որ բուժհամակարգը պարալիզացվի:
«Չեմ կարծում, որ պետք է նման հայտարարություն անել և բարդել իշխանության անգործությունն ընդդիմության վրա, նաև անիմաստ օրենք բերել սահմանափակումների մասին: Քիչ առաջ մեր գործընկերներից մեկն ասում էր՝ աշխատավարձ եք ստանում, ո՞ւր եք՝ չեք եկել հանձնաժողովի նիստին: Դուք ունեք 88 մանդատ, բա իշխանության ներկայացուցիչները ո՞ւր են, որ քվերակեն օրինագիծը ընդունվի: Այսինքն ընդդիմության ձայներով էիք ուզում, որ ձեր օրենքն ընդունվի, որին ընդդիմությունը դեմ էր: Կոչ եմ անում չշահարկել օրենքի քվերակություը: Մեր հարգարժան ԱԺ նախագահի ասելով՝ քֆուր չդնել օրենքի քվեարկության վրա: Յուրաքանչյուր ուժ իր դիրքորոշումն ունի, յուրաքանչյուրը իր գործով է զբաղված»,- պատասխանեց Էդմոն Մարուքյանը
ԱԺ-ն վերջին քվեարկությամբ ընդունեց «Բաժնետիրական ընկերությունների մասին», «Ապահովագրության և ապահովագրական գործունեության մասին» և «Բանկերի և բանկային գործունեության մասին» օրենքներում փոփոխություններ և լրացումներ կատարելու մասին օրենսդրական փաթեթը:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
