«Սա նշանակում է, որ եվրոպական կարգավորման ստանդարտները գործում են նաև Արցախում»
Արցախի Հանրապետության Նախագահ Բակո Սահակյանն այսօր հանդիպում է ունեցել Հայաստանի Հանրապետության հեռուստատեսության և ռադիոյի հանձնաժողովի պատվիրակության հետ՝ կառույցի ղեկավար Տիգրան Հակոբյանի գլխավորությամբ:
Արցախի նախագահի աշխատակազմի տեղեկատվության գլխավոր վարչության հաղորդմամբ, հանդիպմանը, որին մասնակցել են ԱՀ հանրային ծառայությունները և տնտեսական մրցակցությունը կարգավորող պետական հանձնաժողովի նախագահ Միքայել Վիրաբյանը, քննարկվել են հեռահաղորդակցության ոլորտում Հայաստանի և Արցախի փոխգործակցությանը վերաբերող հարցեր:
Բակո Սահակյանը ողջունել է երկու հայկական պետությունների կարգավորիչ մարմինների համագործակցության շրջանակներում համապետական ընտրությունների նախընտրական քարոզչության ժամանակահատվածում իրականացված հեռուստաընկերությունների և ռադիոընկերությունների մշտադիտարկումը՝ այն համարելով կարեւոր ու պահանջված:
ՀՀ հեռուստատեսության և ռադիոյի հանձնաժողովի անդամներին՝ հանձնաժողովի նախագահ Տիգրան Հակոբյանի գլխավորությամբ ընդունել է նաև Արցախի Հանրապետության պետական նախարար Գրիգորի Մարտիրոսյանը։
ԱՀ պետական նախարարի աշխատակազմի տեղեկատվության և հասարակայնության հետ կապերի բաժնի հաղորդմամբ, հանդիպմանն անդրադարձ է կատարվել համապետական ընտրությունների նախընտրական քարոզչության ժամանակահատվածում իրականացված հեռուստաընկերությունների և ռադիոընկերությունների մշտադիտարկման արդյունքներին: Այս հարցում պետական նախարարը բարձր է գնահատել ՀՀ հեռուստատեսության և ռադիոյի հանձնաժողովի ներդրումը՝ ընդգծելով ԱՀ հանրային ծառայությունները և տնտեսական մրցակցությունը կարգավորող հանձնաժողովի հետ հետագա համագործակցության ընդլայնման ու խորացման անհրաժեշտությունը:
ՀՀ հեռուստատեսության և ռադիոյի հանձնաժողովի նախագահը կարևորել է ԱՀ հանրային ծառայությունները և տնտեսական մրցակցությունը կարգավորող հանձնաժողովի կողմից առաջին անգամ կիրառված մշտադիտարկման կարգը՝ տեխնիկական իր հագեցվածությամբ, մեթոդաբանությամբ, կարգերով, մշտադիտարկման գործընթացով և վերջնական եզրակացությամբ: «Սա նշանակում է, որ եվրոպական կարգավորման ստանդարտները գործում են նաև Արցախի Հանրապետությունում»,- նշել է Տիգրան Հակոբյանը:
Պետական նախարար Գրիգորի Մարտիրոսյանն ընդգծել է առաջատար երկրներում իրականացվող գործընթացն Արցախում ներդնելու հաջողված փորձն այն առումով, որ անկախ վերգետնյա հեռարձակողների քանակից, ԱՀ Կարգավորող հանձնաժողովն արդեն ունի լրատվամիջոցների հավասարությունը, մրցակցությունը, խոսքի ազատությունն ապահովելու անհրաժեշտ գործիքակազմը:
Հանդիպմանը անդրադարձ է կատարվել նաև Արցախի տեղեկատվական դաշտի արդիականացմանն ու մրցակցային հարթակների ձևավորմանն ուղղված հետագա համատեղ աշխատանքներին:
Լրահոս
Տեսանյութեր
Մի դարձեք ագրեսիվ գովազդի զոհ. Պիպոյանի խորհուրդը՝ «Սև ուրբաթ»-ին
