Ձեր վստահելի աղբյուրը

Չինաստանի Ուհան քաղաքում գրանցվել է կորոնավիրուսի «ներմուծման» առաջին դեպքը, փոխանցում է «Ռիա Նովոստի»-ն՝ հղում տալով ՉԺՀ-ի առողջապահության հարցերով պետական հանձնաժողովին։

Նշվում է, որ դեպքը գրանցվել է մարտի 31-ին, բայց դեռևս պարզ չէ՝ որ երկրից է եկել հիվանդը։

Ամենայն հավանականությամբ, վարակված անձը արտասահմանից Չինաստան է ժամանել մեկ այլ քաղաքի օդանավակայանից, այնուհետև գնացքով հասել է Ուհան, քանի որ քաղաքի հետ օդային հաղորդակցությունը վերսկսվելու է միայն ապրիլի 8-ին, բայց ուղևորատար գնացքները արդեն կարող են մտնել Ուհան:

Այս տարվա հունվարի 23-ից Ուհանն իրականում մեկուսացվել է արտաքին աշխարհից։ Կորոնավիրուսի բռնկման պատճառով քաղաքում դադարեցվել է տրանսպորտային կապը, չեն գործում մետրոն, ավտոբուսները, լաստանավերը, ջրային տրանսպորտը քաղաք չի թույլատրվում։Օդանավակայանը և երկաթուղային կայարանները չեն գործում, բնակիչների ելքը քաղաքից արգելված է:

Հուբեյի նահանգի առողջապահության կոմիտեն ավելի վաղ հայտնել էր, որ մարտի 25-ի կեսգիշերից հանվել են մարզից և դեպի մարզ ճանապարհորդության սահմանափակումները, մինչ այժմ միակ բացառությունը կլինի հենց Ուհանը: Այնտեղ կարանտինի ռեժիմը պլանավորվում է վերացնել ապրիլի 8-ից: