Ձեր վստահելի աղբյուրը

Արցախի Կենտրոնական ընտրական հանձնաժողովը ստացել է 9 դիմում-բողոք, դատախազությունը ստացել է 44 հաղորդում, ՄԻՊ-ի մոտ արձանագրվել է 12 դեպք, ԿԸՀ-ում  ընտրությունների նախորդ օրերին և ընտրության օրը գործել է թեժ քիչ, 30 քաղաքացի է զանգել՝ 6 ենթադրյալ խախտումների և 24 պարզաբանում ստանալու համար։ Լրագրողների հետ հանդիպմանն ասաց Արցախի Հանրապետության ԿԸՀ նախագահ Սրբուհի Արզումանյանը։

Հիշեցնենք, որ նախօրեին Արցախում կայացել են նախագահական և խորհրդարանական ընտրություններ։  Ս. Արզումանյանն ասել է, որ կայանալու է նախագահական ընտրությունների երկրորդ փուլ։ Հարցին, թե նախագահական ընտրությունների երկրորդ փուլը ենթադրո՞ւմ  է քարոզարշավ, կորոնավիրուսի համաճարակի հետ կապված հնարավո՞ր է չկայանա, ի՞նչ է նախատեսում Արցախի օրենսդրությունը նման դեպքում, ԿԸՀ նախագահը նախ ասաց, որ հակահամաճարակային որոշ միջոցառումներ ձեռնարկվել են, իսկ ինչ վերաբերում է ապրիլի 14-ին ընտրությունների փաստացի կայացմանը կամ   իրականացմանը,  բնականաբար, ամեն հարց քննարկվում է  արցախցի ընտրողի առողջական անվտանգության նկատառումերից ենելով։

«Ես հրապարակել եմ երկրորդ փուլի և ժամկետի անցկացման օրենսդրական պահանջը, ինչը հստակ ֆիքսված է օրենքում, մնացած առանձնահատկություններն այս ոչ ստանդարտ իրավիճակում դառնալու է պատկան մարմինների քննարկման թեման, խնդրո առարկան»,- ասաց Ս.Արզումանյանը։