Ձեր վստահելի աղբյուրը

«Մոտ 60  մասնագետ անգործ է մնացել»,- այսօր լրագրողների հետ զրույցում ասաց համաճարակաբան Արշակ Պապոյանը՝ անդրադառնալով «ՁԻԱՀ»-ի կենտրոնի և «Նորք» ինֆեկցիոնի միավորմանը։

Պապոյանը տեղեկացրեց, որ կենտրոնի մասնագետներից ոմանք միացել են կորոնավիրուսի դեմ պայքարին, և տարբեր կլինիկաներում աշխատում են, մյուսներն՝ առայժմ անգործ են

«Կորոնավիրուսի դեմ պայքարը պետության առջև ծառացած համար մեկ խնդիրն է, բայց մենք չպետք է մոռանանք, որ կան մյուս վարակները։ Չի կարելի անտեսել աշխատանքները, որոնք պետք է մշտապես տարվեն, որովհետև դրանց ոչ պատշաճ իրականացումը վաղը բերելու է ոլորտում խնդիրների։ Իսկ ՄԻԱՎ-ի հետ կապված խնդիրները բավականին ծանր են, քանի որ այն քրոնիկ հիվանդություն է, և հիվանդը ողջ կյանքում կարիք է ունենալու բժշկական սպասարկման։ Եվ այդ դաշտը բաց թողնել չի կարելի։ Այդ խնդիրները սկսելու են առաջանալ հիմա, բայց ավելի ակնառու են դառնալու մի քանի տարի հետո»,- ասաց բանախոսը։

Նրա խոսքով, առողջապահական համակարգում հիմնական խնդիրն այն է, որ մասնագիտական կարծիքը որևէ մեկին չի հետաքրքրում։ Նա վստահեցնում է, որ որոշումը քաղաքական է, ինչն  էլ իր հետևանքներն ունենալու է առողջապահության ոլորտի վրա։

Ուրոլոգ Գևորգ Գրիգորյանն էլ նշեց, ոչ միայն մասնագիտական կարծիքն է անհետաքրքիր իշխանություններին, այլ նաև ծառայությունների որակը։

«Բազմաթիվ անգամներ մենք բարձրացրել ենք խնդիրը, որ կենտրոնի փակումից հետո ծառայությունների որակն ընկնելու է, և այսօր էլ տեսնում ենք, օրինակ, «ՁԻԱՀ»-ի կենտրոնի նորանշանակ ղեկավարությունը հայտարարում է, որ կենտրոնը բնականոն ռեժիմով աշխատում է, այնինչ ծառայությունների մոտ քսան տոկոսն է այս պահին իրականացվում։ Եվ ո՞ւմ են ուզում այդ ստով կերակրել, ուզում են կառավարությանը, նախարարությանը թե՞ ժողովրդին խաբել։ Իրականում կենտրոնը շատ բաներ չի իրականացնում, կամ իրականացնում է ոչ մաքսիմալ մակարդակով։ Ստեղծվել է իրավիճակ, որից առաջ պետք է քննարկում արվեր մասնագետների հետ»,- ասաց Գրիգորյանը։

Պարացելսուս ՀԿ-ի հիմնադիր-նախագահ Նունե Ներսիսյանը հավելեց՝ ամիսներ առաջ հակատուբերկուլյոզային դիսպանսերները փակվեցին, իսկ այսօր առողջապահության նախարարությունը փնտրում է թոքաբանների, որպեսզի կարողանա պայքարել կորոնավիրուսի դեմ։

Նրա խոսքով, այսօր առողջապահության նախարարությունը վերապատրաստում է տրավմատոլոգների կամ այլ մասնագետների, որպեսզի կարողանա պայքարել կորոնավիրուսի դեմ. «Կարծում եմ՝ շատ շուտով այս կենտրոնի փակման հետևանքների մասին էլ կլսենք, հատկապես էն պարագայում, որ նման մասնագետներն այսօր չեն աշխատում և մենք ունենք խնդիրներ»։

Գևորգ Գրիգորյանը հույս հայտնեց, որ կենտրոնի հարցով դեռևս ողջամիտ որոշում կլինի.
«Ինձ համար մինչ այսօր անհասկանալի մնաց՝ ինչես արձագանք չեղավ փաստին, որ մեկ բուժհաստատության աշխատակիցների 80%-ը միաժամանակ ազատման դիմում գրեց։ Իհարկե, աշխատակիցների 60%-ն է ազատվել աշխատանքից, բայց մարդիկ գրել էին դիմում, որպեսզի իրենց ձայնը բարձրացնեին, դա իրենց վերջին ճիչն էր։ Բայց չգտնվեց մեկը, որ ասեր՝ էդ դիմումներով մարդիկ ինչ-որ մի բան ուզում էին ասել։ Անհնար է, որ էդ քանակի մարդիկ հետապնդեն անձնական շահեր կամ կեղծ արժեքներ»։

Արշակ Պապոյանն էլ տեղեկացրեց, որ մարդիկ դիմումներ գրեցին՝ հաշվի չառնելով, որ ունեն ընտանիքներ, որոնց պետք է պահեն։ Նա վստահեցրեց, որ այնուամենայնիվ, հետամուտ են լինելու, որպեսզի իրենց ձայնը հասանելի լինի։

«Կորոնավիրուսի տարածման հետ կապված դա հետ մնաց, բայց դա չի նշանակում, որ մենք մոռացել ենք այդ հարցերը»,- նշեց Պապոյանը։