Ձեր վստահելի աղբյուրը

Ապրիլյան պատերազմից տուժած Մարտակերտի շրջանի Թալիշ գյուղում  արդեն  54 ընտանիք է բնակվում 174 բնակչով։ Panorama.am-ի հետ զրույցում Թալիշ համայնքի ղեկավար Վարուժան  Օհանյանն ասաց, որ 54 ընտանիքից 10-ի տները  հիմքից նոր կառուցված են, իսկ  մնացած 44 տունը վերանորոգված։

Նա նշեց, որ գյուղապետարանի շենքը վերանորգված է, դպրոցի ու մանկապարտեզի շենքերը նոր են կառուցվել՝ ավելի ապահով տեղում։ Դպրոցն այսօր ունի 26 աշակերտ, 12 երեխա էլ հաճախում է մանկապարտեզ։

Նախքան Ապրիլյան պատերազմը Թալիշում բնակվել է 150  ընտանիք՝ 500 բնակչով։ Վ.Օհանյանն ասաց, որ վերադարձած ընտանիքները մինչև պատերազմ էլ ապրել են Թալիշում։ Նա նշեց, որ սպասում են նոր եկողների, սակայն դեռ  նոր դիմողներ չկան։

Ավելի վաղ Panorama.am-ի հետ զրույցում Թալիշի նախկին գյուղապետ Վիլեն Պետրոսյանն ասել էր, Արցախյան պատերազմի ժամանակ՝ 1992-1994 թթ-ին Թալիշը գտնվել է թշնամու տիրապետության տակ, սակայն 1994 թվականի ապրիլի 14-ին գյուղն ազատագրվել է: Թալիշը լիովին ավերված էր, չկար ոչ մի կանգուն տուն, բայց թալիշցիները վերադարձան հայրենի գյուղ և սկսեցին վերականգնել իրենց ավերված օջախները. գյուղը վերակառուցվեց, վերաբնակեցվեց ու շենացավ մինչև 2016 թվականի ապրիլի 2-ը։ Ապրիլյան պատերազմի ժամանակ գյուղի 3 տարեց բնակիչներ դաժանավար սպանվել էին ադրբեջանցիների կողմի։