Ձեր վստահելի աղբյուրը

«Առավոտվա դրությամբ 92 դրական դեպք կա, որոնց գերակշիռ մեծամասնությունը կասկածելի գոտում է գտնվել՝ կա´մ եղել են կարանտինում, կամ պացիենտների շփման զոնայում»,- այսօրվա կառավարության նիստում հայտնեց առողջապահության նախարար Արսեն Թորոսյանը:

Նրա խոսքով, իհարկե կան նաև նոր դեպքեր՝ բերովի տարբեր երկրներից, թե´ ցամաքային ճանապարհով, թե´ օդային. «Նրանց բոլորի շփման շրջանակները պարզվում է, որպեսզի շարունակենք այն բոլոր գործողությունները որոնք մինչև հիմա արել ենք՝ հաստատված դեպքերի հայտնի կոնտակտների մեկուսացում»։

Նախարարը տեղեկացրեց, որ առանձնացվել է 16 բժշկական հաստատություն,որտեղ պահվում են, թե´ դրական, բայց թեթև ձևերով պացիենտները և թե´ այն քաղաքացիները, ովքեր շփվել են հաստատված դեպքերի հետ:

«Հայաստանում 9 բժշկական կազմակերպություն գրեթե զբաղվում են միայն կորոնավիրուսի պացիենտների բուժումով: Դրանք են՝ «Նորք» ինֆեկցիոն հիվանդանոցը, Նորք-Մարաշի օրթոպեդիայի ինստիտուտը, Ոստիկանության հոսպիտալը, «Սուրբ Աստվածամայր» բժշկական կենտրոնի ծննդատան մասնաշենքը, որն ամբողջությամբ վերապրոֆիլավորվել է, Արտաշատի բժշկական կենտրոնը, Գյումրու և Վանաձորի ինֆեկցիոն հիվանդանոցները, Կապանի բժշկական կենտրոնի առանձին մասնաշենքը»,- հայտնեց նախարարը և նկատեց, որ թվերի մեծացման պատճառով որոշում է կայացրել, որ ամենամեծ բժշկական կենտրոնը նունպես պետք է զբաղվի այս խնդրով»,- ասաց նա։

Դա, ըստ Թորոսյանի, «Սուրբ Գիրգոր Լուսավորիչ» բժշկական կենտրոնն է, որն այսօրվա ընթացքում ամբողջությամբ կդատարկվի և կծավալվի որպես կորոնավիրուսի դեմ պայքարող հիվանդանոց՝ ունենալով ամնամեծ մահճակալային ֆոնդը:

Նախարարի խոսքով՝ այնտեղից ռեամինացիոն պացիենտները կտեղափոխվեն այլ բժշկական կենտրոններ, որպեսզի նրանց կյանքին վտանգ չսպառնա. «Դա մեզ թույլ կտա երկար ժամանակ ունենալ բավարար մահճակալներ, որպեսզի բոլոր պացիենտները հոսպիտալացվեն: Հատկապես նրանք, որոնք ունեն բժշկական օգնության կարիք, իսկ թեթև ձևերը կմեկուսացվեն հյուրանոցներում՝ ինչպես որոշել էինք մեկ շաբաթ առաջ»:

Վարչապետ Նիկոլ Փաշինյանն էլ նկատեց, որ մեկ օրվա արդյունքներով պետք չէ եզրակացություն անել։ «Բայց մենք դեպքերի աճի որոշակի վտանգի առաջ ենք կանգնած: Չնայած՝ նախորդ օրը մենք ունեինք տեմպի նվազում: Կարևոր է նշել, որ մենք թեստավորման քանակը մեծացնում ենք և դա ճիշտ մոտեցում է: Չենք ուզում հնարավորինս քիչ դեպք ախտորոշել, ընդհակառակը՝ ուզում ենք հնարավորինս շատ դեպք ախտորոշել»,- արձագանքեց վարչապետը:

Նկատելով, որ իրավիճակը դեռևս վերահսկելիության շրջանակներում է՝ վարչապետը անդրադարձավ հիմնախնդրիn. «Կա երկու ծայրահեղություն: Մի ծայրահեղությունը խուճապն է այն պրոցեսի հետ կապված, որն անթույլատրելի է և դրա կարիքը չկա և երկրորդ պրոբլեմը համատարած հանգստությունն է այս համաճարակի տարածման հետ կապված: Մենք սկզբնական շրջանում կարողացանք կանխել խուճապային երևույթները, բայց ինչպես հասկանում եմ՝ չափից ավելի շատ ենք կանխել այդ խուճապային երևույթները և չենք կարողանում մեր հանրությանը հետ բերել հավասարակշռված վիճակից, որովհետև երկրում տիրում է համատարած հանդարտություն, երկրում տիրում է համատարած հանգստություն: Իհարկե դա լավ է զուտ սոցիալ-հոգեբանական տեսակետից, բայց համաճարակային տեսակետից պրոբլեմ է, որովհետև հենց այս հանգստություն է, որ մեր համար ստեղծում է վտանգ, որ վարակի տեմպը կավելանա»,- հայտարարեց Նիկոլ Փաշինյանը:

Այնուհետև նա դիմել քաղաքացիներին։

«Սիրելի հայրենակիցներ ես խնդրում եմ այդքան հանգիստ մի վերաբերվեք այս պրոբլեմին, Մեծ հաշվով նաև հասկանալի է, որ տեսեք այսօր մեր հիվանդների 80 տոկոսը նույնիսկ ջերմություն չունի: Այսինքը, եթե սա լիներ նախկին մեզ հայտնի վարակը, գրիպ, մենք մեր հիվանդների 80 տոկոսին կասեինք գնացեք տուն, հեղուկ շատ խմեք, թեյ խմեք և վերջ: Այսօր էլ 80 տոկոսին չենք բուժում, բայց պահում ենք հաստատություններում մի պարզ պատճառով՝ եթե դուրս գան կվարակեն այլ քաղաքացիների: Նրանց նկատմամբ ժամանակ առ ժամանակ թեստ է արվում և երբ թեստը կրկնակի բացասական է ցույց տալիս դուրս են գրվում: Ռիսկի խմբում տարիքով հայրենակիցներն են և մեկուսացման պահանջները չպահելով՝ մենք առաջին հերթին վտանգի տակ ենք դնում ավագ սերնդի ներկայացուցիչներին: Սա չի նշանակում՝ երաշխավորվում է, որ ավելի երիտասարդների համար վիրուսը լինելու է անվտանգ: Սա այն դեպքը չէ, որ այս արտակարգ միջոցները կատարվում են քաղաքական կամ այլ նպատակներով, այն արվում է քաղաքացիների անվտանգության համար և ես կարծում եմ, որ պետք է քաղաքացիներին խնդրենք, որ ավելի շատ ջանք գործադրեն սեփական անվտանգությունը պահելու հանար»: