Ձեր վստահելի աղբյուրը

Կորոնավիրուսի բռնկումը առնվազն մինչև ապրիլի 30-ը օրացույցից ջնջել է անգլիական ֆուտբոլային բոլոր հանդիպումները, ինչը ֆինանսական դժվարին կացության մեջ է դրել ակումբներին, փոխանցում է «Բի-Բի-Սի»-ն։

Ամենադժվար որոշումներից մեկն այն է, թե ինչպես պետք է վարձատրվեն ֆուտբոլիստներն ու ակումբի մյուս աշխատակիցները։

Ֆուտբոլիստների պրոֆեսիոնալ ասոցիացիան իր բոլոր անդամներին հորդորել է չհամաձայնել աշխատավարձերի իջեցմանը կամ հետաձգմանը, քանի դեռ իրենք չեն խոսել միության հետ:

Նշվում է, որ քաղաքական գործիչները դատապարտել են այն ակումբերին, որոնք իրենց չխաղացող աշխատակիցներին որոշել են արձակուրդ ուղարկել։ Այդ քայլը հանգեցնում է «բարոյական վակուումի»։

Ըստ աղբյուրի, Պրեմիեր լիգան, Անգլիայի ֆուտբոլի լիգան և լիգայի կառավարիչների ասոցիացիան շարունակում են  քննարկել խաղացողների աշխատավարձի և 2019-20 մրցաշրջանի վերսկսման շուրջ ծագած հարցերը։

Այսպիսով, «Արսենալը» որոշել է մինչև ապրիլի վերջ վճարել իր բոլոր աշխատակիցներին, սակայն ակումբը կարող է վերանայել այս որոշումը, եթե հետաձգվի մրցաշրջանի վերսկսումը։

«Բորնմուտը» հետևում է կառավարության օրինակին, և մի շարք աշխատակիցների ուղարկում է վճարովի արձակուրդի։

Ակումբի մենեջեր Էդին Հոուն, ղեկավարի օգնական Ջեյսոն Թինդալը, գլխավոր գործադիր տնօրեն Նիլ Բլեյքը և տեխնիկական տնօրեն Ռիչարդ իրենց կամքով հրաժարվել են աշխատավարձի զգալի մասից։

«Բերնլին» խոստացել է շարունակել վճարել աշխատակազմին արձակուրդի ողջ ընթացքում։

«Տոտենհեմը» որոշել է առաջիկա երկու ամիսներին ակումբի չխաղացող  550 աշխատակիցների վճարումները կրճատել 20%-ով։

Ակումբի ղեկավար Դանիել Լևին, ով նախորդ տարի վաստակել է 7 միլիոն ֆունտ ստեռլինգ, հրաժարվել է իր վաստակի մեկ հինգերորդ մասից և կոչ է արել Պրեմիեր լիգայի խաղացողներին հետևել իր քայլին։