Ձեր վստահելի աղբյուրը

Առողջապահական ու աշխատանքի տեսչական մարմնի ղեկավարը Հակոբ Ավագյանին այսօր Հայկական միասնական տեղեկատվական կենտրոնում լրագրողները տեղեկացրեցին, որ խանութների աշխատակիցները նույն ձեռնոցը կրում են առավոտից երեկո, տարբեր մակերևութների հետ են շփվում, հպվում են վաճառվող սննդին և հարցրեցին, թե ինչպե՞ս է իրականացվում վերահսկողությունը:

«Թե քանի անգամ են ձեռնոցներ տալիս ու ջերմաչափում, մենք այդ ստուգայցի պահին ենք նկատում: Ջերմաչափելը կարողանում ենք վերահսկել լրացվող մատյանների միջոցով, իսկ ձեռնոցների դեպքում՝ կախված նրանից, թե ինչ ենք արձանագրում ստուգման պահին: Զամբյուղների և սայլակների ախտահանումը մեր մշտադիարկումների մեջ են մտնում, դրա համար սահմանված է մատյան և նշվում է, թե երբ է այդ սայլակը, կամ զամբյուղը ախտահանվում: Երբեմն սպասում ենք այնքան, մինչև սայլակն անցնում է շրջապտույտ և արձանագրում ենք ախտահանումը»,-հայտնեց Հակոբ Ավագյանը:

Հարց ուղղվեց, թե արդյո՞ք վերահսկվում է բժշկական դիմակների շուկան, ի՞նչ դիմակներ են վաճառվում։

«Մի քանի օր առաջ պարետատանը Տեսչական մարմնի գրասենյակի կողմից առաջարկվեց, որ այդ հարցը կանոնակարգվի, քանի որ դիմակների ստանդարտացում չկա, կարծեմ, նաև ԵԱՏՄ տարածքում: Էկոնոմիկայի նախարարությունը մշակում է ստանդարտներ, որից հետո ազգային ընթացակարգով կհաստատվի տեխնիկական չափանիշները»,- հայտնեց տեսչական մարմնի ղեկավարը։

Դրանք, ըստ նրա, պետք է շնչադիմակի չափանիշներին համապատասխանեն։

«Դիմակների մասով մեր մշտադիտարկումներում տեսնում ենք, որ նույն սուպերմարկետներում գործատուները երբեմն ձևական դիմակներ են տալիս իրենց աշխատակիցներին: Որպես աշխատողների իրավունքների պաշտպանության վերահսկողական մարմին՝ մենք շատ խիստ ուշադրություն ենք դարձնում դրան: Ակնհայտ է, որ այդ դիմակը աշխատակիցը մեկ ժամից ավելի չի կարող կրել, որովհետև պատրաստված է այնպիսի նյութից, որ մեկ ժամից էլ հնարավոր չէ շնչել: Դիմակի անունը հենց այնպես չի սահմանված «շնչադիմակ»: Աշխատողը պետք է շնչելու հնարավորություն ունենա, առավել ևս, որ 8 ժամից ավելի աշխատանքի մասին է խոսքը գնում»,- ասաց նա։

Լրագրողը հիշեցրեց՝ Արսեն Թորոսյանը կառավարության նիստում հայտարարել էր, որ վերջին հիվադացության դեպքերը բերվել են դրսից: Որ երկրներից են բերվել վարակի դեպքերը և վերջին օրերին սահմանային կետերում օրական քանի ջերմության և այլ ախտանիշների դեպքեր են հայտնաբերվել:

«Հաստատում եմ այդ փաստը: Այդ 172 հոսպիտալացվածների մեջ եղել են նաև վարակակիրներ և մեկուսացվել են սահմանային հսկիչ կետից: Հիմնական ուղևորահոսքը Բագրատաշենի հսկիչ կետից է: Երեկ 186 անձ է անցել, որոնց մեջ եղել են նաև բեռնատարերի վարորդներ: Նրանց մեջ եղել են օտարերկրացիներ և մենք ելնելով արարողակարգային գործառույթներից, ախտանիշներ ենք հայտնաբերել ու հոսպիտալացրել ենք նրանց։ Այսօր մեր առողջապահական մարմինները նրանց մոտ հայտնաբերել են վարակակիր»,- նշեց տեսչական մարմնի ղեկավարը: