Ձեր վստահելի աղբյուրը

Մեծ Բրիտանիայի վարչապետ Բորիս Ջոնսոնի առողջական վիճակի վատթարացման ու նրա՝ ինտենսիվ թերապիայի տակ գտնվելու լուրի տարածումից հետո աշխարհի առաջնորդներy շուտափույթ ապաքինում են մաղթում վարչապետին։ Նրանց թվում առաջիններից էին Ֆրանսիայի նախագահ Էմանուել Մակրոնը, Գերմանիայի կանցլեր Անգելա Մերկելը, ԱՄՆ նախագահ Դոնալդ Թրամփը։ Այս մասին գրում է Euronews-ը։

Ջոնսոնին կառավարության ղեկավարի պաշտոնում ժամանակավորապես փոխարինել է Մեծ Բրիտանիայի արտգործնախարար Դոմինիկ Ռաաբը:

Ֆրանսիայի նախագահ Էմանուել Մակրոնը թվիթերյան իր էջում գրել է․ «Իմ աջակցությունն եմ հայտնում Բորիս Ջոնսոնին, նրա ընտանիքին ու բրիտանացի ժողովրդին՝ այս դժվարին ժամանակում։ Ցանկանում եմ արագ վերականգնում՝ այս փորձության պահին»:

Նմանատիպ բառեր է օգտագործել Գերմանիայի կանցլեր Անգելա Մերկելի խոսնակ Սթեֆեն Սեյբերտը, նշելով, որ կանցլերը հույս ունի, որ Ջոնսոնը շուտով կլքի հոսպիտալը։

ԱՄՆ նախագահ Դոնալդ Թրամփը հայտարարել է, որ ցանկանում է արտահայտել իր ազգի բարեմաղթությունները՝ Բորիս Ջոնսոնին բնութագրելով որպես անձնական ընկեր և «ուժեղ մարդ»:

Թրամփը նաև ավելացրել է, որ խնդրել է ԱՄՆ երկու բժշկական ընկերություններ կապվել Լոնդոնի հետ՝ տեսնելու, թե արդյո՞ք ԱՄՆ-ն կարող է օգնել:

ԵՄ-ի բարձրաստիճան ղեկավարները ևս Twitter-ի միջոցով ջերմ ցանկություններ են հայտնել։

Հանձնաժողովի նախագահ Ուրսուլա ֆոն դեր Լեյենը հայտարարել է, որ իր մտքերը Ջոնսոնի և նրա ընտանիքի հետ են։ Նմանատիպ գրառումներ են կատարել նաև ԵՄ Խորհրդի նախագահ Շառլ Միշելը,  և Brexit-ի գլխավոր բանակցող Միշել Բարնյեն, որի մոտ ևս կորոնավիրուս է ախտորոշված։

Շուտափույթ ապաքինում են մաղթել նաև Կանադայի վարչապետ Ջասթին Թրյուդոն, Հնդկաստանի վարչապետ Նարենդրա Մոդին,  Ավստրալիայի վարչապետ Սքոթ Մորիսոնը:

Մեծ Բրիտանիայում  Ջոնսոնին առողջացում են մաղթել ընդդիմադիր Լեյբորիստական կուսակցության նորընտիր ու նախկին նախագահները, նախկին վարչապետներ Թերեզա Մեյը, Դևիդ Քեմերոնը,  Շոտլանդիայի առաջին նախարար Նիկոլա Ստուրջեոնը։

«Այս սարսափելի վիրուսը խտրականություն չի դնում: Յուրաքանչյուրը կարող է այն ձեռք բերել: Յուրաքանչյուրը կարող է այն տարածել»,- գրել է Թերեզա Մեյը։