Ձեր վստահելի աղբյուրը

«Որոշակի հակասություններ կան այն պատասխաններում, որոնք մեզ են տրվում կապված դատավոր Աննա Դանիբեկյանի անաշխատունակության ու իրական պատկերի հետ»,-լրագրողների հետ հանդիպմանը հայտարարեց ՀՀ երկրորդ նախագահ ՌՈբերտ Քոչարյանի փաստաբանական թիմի անդամ Հայկ Ալումյանը։

Նա հիշեցրեց, ըստ պաշտոնական տեղեկատվության,  Ռոբերտ Քոչարյանի ու մյուսների գործը քննող դատավոր Ա. Դանիբեկյանը անաշխատունակության թերթիկ է ներկայացրել մարտի 13-ին, մինչդեռ նույն օրն աշխատանքային ժամի ավարտին փաստաբանական թիմից Արամ Վարդևանյանին դատավորի աշխատակազմից վստահեցրել են, որ մարտի 17-ին նշանակված նիստն անպայման կայանալու է։

Ալումյանը շեշտեց, որ նիստից մեկ օր առաջ՝ մարտի 16-ին աշխատանքային օրվա ավարտին ինքը միջնորդություն է ներկայացրել դատարան Ռոբերտ Քոչարյանի կալանքն անձնական երաշխավորությամբ փոխելու վերաբերյալ։ Հայաստանի ու Արցախի նախկին չորս  վարչապետներ պատրաստակամություն են հայտնել երաշխավորել խափանման միջոցը փոխելու համար։

«Մարտի 16-ին մեզ ոչինչ չի ասվում այն մասին, որ դատավոր Աննա Դանիբեկյանն անաշխատունակության թերթիկ է ներկայացրել։ Ու հանկարծ ամսի 17-ին՝  նիստից քիչ առաջ մեզ ասում են, որ նիստը չի կայանալու, քանի որ դատավոր Աննա Դանիբեկյանը առողջական վիճակի պատճառով չի կարող ներկայանալ դատական նիստի։ Եվ այդ վիճակը տևում է մինչև այսօր»,-իրավիճակը ներկայացրեց փաստաբանը։

Նա նկատեց, այդ ընթացքում կորոնավիրուսով պայմանավորված իրավիճակը Հայաստանում բարդանում է, հաշվի առնելով, որ պարոն Քոչարյանն առողձական խնդիրներ ունի, մարտի 24-ին նոր միջնորդություն են ներկայացնում՝ խափանման միջոցը վերացնելու վերաբերյալ։

«Այդ միջնորդությունը մինչ օրս քննության չի ենթարկվել։ Այս առումով նույն պատասխանն են տալիս, Աննա Դանիբեկլյանն ունի առողջական խնդիրներ, թե ի՞նչ խնդիրներ են, դրանք ե՞րբ կարող են լուծվել, գոնե մոտավոր՝ մի քանի օրվա՞, շաբաթվա՞ խնդիր է, մեզ ոչ ոք ոչինչ չի ասում։ Ներկայացվում է  այնպես, որ դա բացառապես Աննա Դանիբեկյանի անձնական խնդիրն է, և ոչ ոք չի կարող դրա վերաբերյալ բացատրություն տալ։ Այնինչ, դա միայն իր անձնական խնդիրը չէ»,-ասաց փաստաբանը։

Փաստաբանը համեմատության համար նշեց, եթե մի երկրի վարչապետ առողջական խնդիրներ է ունենում, դրա մասին տեղեկացնում են հասարակությանը, այս պարագայում էլ, ըստ նրա, պետք է իրենց ներկայացնեն դատավորի խնդիրը։

«Մենք պետք է իմանանք, թե ո՞րն է խնդիրը, եթե ոչ դետալացված, ապա պետք է ասեն, մոտավորապես, երբ է սպասվում ապաքինումը»,-ասաց նա։

Ալումյանը հիշեցրեց՝ դիմել են ընդհանուր իրավասության դատարանի նախագահին, այս ընթացքւոմ գործը մեկ այլ դատավորի մակագրելու համար, սակայն ի պատասխան, դատարանի նախագահը հավաստիացրել է, որևէ այլ դատավոր իրավասու չէ հարցը քննել։

«Դատարանի նախագահը տարօրինակ ձևով անտեղյակ է ԲԴԽ 2018 թվականի հունիսի 9-ի որոշումից, որտեղ ասված է, որ դատական գործի շրջանակում ներկայացված  միջնորդությունները հանձնվում են տվյալ գործը քննող կամ քննած դատավորին, բացառությամբ այն դեպքերի, երբ տվյալ գործը  քննող կամ քննած դատավորը գտնվում է  արձակուրդում, կամ օրենքով սահմանված այլ հիմքով բացակայում է։ Իսկ միջնորդությունների քննությունների համար սահմանված են սեղմ դատավարական ժամկետներ։ Նույն ԲԴԽ որոշմամբ, եթե դատավորը չի կարողանում ներկայանալ աշխատանքի, ապա տվյալ միջնորդությունները ծրագրի միջոցով պատահական ընտրությամբ հնարավորինս հավասարաչափ բաշխվում են տվյալ դատարանի համապատասխան մասնագիտացում ունեցող այլ դատավորների միջև»,-ասաց Ռոբերտ Քոչարյանի պաշտպանը։

Նա նկատեց, սա այն է, որ Երևան քաղաքի ընդհանուր իրավասության դատարանի նախագահը պետք է արած լիներ դեռ մարտի 17-ին, մինչդեռ, ըստ փաստաբանի, նախագահը կամ անտեղյակ է այդ որոշումից, կամ էլ տեղյակ լինելով միտումնավոր հնարավորություն է ստեղծում, որ միջնորդության քննարկումը ձգձգվի։

«Ես այս երկու վարկածների միջև, մաշտաբների առումով, մեծ տարբերություն չեմ տեսնում։ Մի դեպքում գործ ունենք դատարանի անտեղյակ նախագահի հետ, մյուս դեպքում՝ ուղղակի օրենքի խախտման հետ, ընդ որում խախտման արդյունքը լինելու է բավականին ծանր։ Այսքան ժամանակ մեր միջնորդությունը չի քննարկվում, իսկ պարոն Քոչարյանը գտնվում է  անազատության մեջ»,-ասաց բանախոսը։