Ձեր վստահելի աղբյուրը

«Մենք առաջիկայում սպասում ենք բուժվածների թվի որոշակի աճ, նաև մեկուսացումից դուրս եկած քաղաքացիների որոշակի աճ»,- կառավարության այսօրվա նիստում ասաց ՀՀ վարչապետ Նիկոլ Փաշինյանը:

Նա նշեց, որ վաղը պարետատանը կքննարկեն հետագա անելիքները, թե երկուշաբթի օրվանից ինչ կարգավորումներ պիտի գործեն, բայց այս պահին իրենց ամենամեծ մարտահրավերը այն է, որ վաղվանից արդեն պետք է ստեղծեն օրական հազար թեստի հնարավորություն:

«Այսօր խորհրդակցություն ենք ունեցել և նախարարը պարզաբանել է, որ այս համատեքստում ինչ պետք է անենք: Առաջին փուլում հնարավոր է թեստերի թիվը հազարի չհասնի, այնուամենայնիվ, քննարկումների արդյունքում եկանք այն եզրակացության, որ պետք է ցուցում լինի: Այսինքն՝ ուղղակի մարդկանց առանց որևէ չափանիշի հրավիրել ու թեստավորել, դա ուղղակի կլինի ժամանակի և ռեսուրսի անիմաստ կորուստ:

Վաղվանից մենք ցուցումով մարդկանց, մասնավորապես, բոլոր բուժաշխատողներին, թոքաբորբով հիվանդ բոլոր քաղաքացիներին, ենթադրում եմ, այլ վիրուսային հիվանդություններ ունեցող քաղաքացիներին պարտադիր կթեստավորենք և դրա արդյունքներով ավելի ամբողջական պատկերացում կկազմենք մեր ընթացիկ իրավիճակի մասին: Չնայած վերջին օրերի քննարկումները մեզ բերում են այնպիսի եզրակացության, որ ընդհանուր առմամբ տիրապետում ենք իրավիճակին և պարզ է մոտավորապես, թե ինչ է կատարվում»,- ասաց վարչապետը: