Մենք դեռ երկար պետք է ապրենք կորոնավիրուսի հետ. Թորոսյան
«Բեռները, որոնք գալիս են Երևան, հնարավոր չի դատարկել Մեղրիում. դրանք են՝ բիտումը, կլինկերն ու ապակին։ Ուրիշ բեռ Իրանից չի գալիս Երևան»,- ԱԺ առողջապահության և սոցիալական հարցերի հանձնաժողովի նիստում ասաց ՀՀ առողջապահության նախարար Արսեն Թորոսյանը՝ պատասխանելով ԱԺ «Բարգավաճ Հայաստան» խմբակցության պատգամավոր Սերգեյ Բագրատյանի հարցին։
Պատգամավորը հետաքրքրվել էր՝ արդյոք ժամանակը չէ, որ հենց սահմանում Հայաստան ժամանող քաղաքացիների թեստավորումն իրականացվի. «Ինչո՞ւ պարետին չեք կարողանում փոխանցել, որ որոշում ընդունվի՝ էս իրավիճակում իրանական մեքենաները չգան հասնեն Երևան։ Ապրանքը դատարկեն Մեղրիում, մեր մեքենաները գնան բերեն։ Սա նախ մեր վարորդներին հնարավորություն կտա աշխատելու, երկրորդն էլ ռիսկերը կնվազեցվեն»։
Թորոսյանը տեղեկացրեց, որ մյուս բեռները փոխանցվում են միջսահմանային գոտում, այսինքն՝ երկու սահմանների միջև կանգնում են բեռնատարները և ապրանքը մի մեքենայից տեղափոխվում է մյուս մեքենա։
«Օրական թողունակությունը Մեղրիի մաքսակետում 30 մեքենա է։ Սկզբում մենք ամեն ինչ բերում էինք մի մաքսային պահեստ, որտեղ շատ դժվար էր հսկողություն անել, դժվար էր վարորդների և բնակիչների, վարորդների և լցակայանների աշխատակիցների մեջ շփումը զրոյացնել։ Բայց էդ փոքր ժամանակահատվածում մենք չենք արձանագրել իրանցի վարորդների կողմից հիվանդության փոխանցման որևէ դեպք»,- ներկայացրեց Թորոսյանը։
Նա ասաց, որ հիմա միջսահմանային հատվածում բոլոր բեռները թույլատրվում է փոխանցել, բայց էլի օրական 30 մեքենայի սահմանում։
Թորոսյանը տեղեկացրեց նաև, որ սահմանին թեստեր անելը բժշկական տեսանկյունից անիմաստ է։
«Ուզում եմ ասել, որ Չինաստանից եկած 60 հազար թեստը գնվել է Հայաստանի բյուջեի հաշվին, այն նվեր չէ։ Դրանք բոլորը «ՊՇՌ» թեստեր են, որոնցից ամեն մեկն անելը տևում է 5 ժամ՝ բարձր պատրաստվածությամբ լաբորատորիայում, որից Հայաստանում շատ քիչ կա՝ մոտ վեց հատ նախարարության ենթակայության տակ, և երկուսը՝ մասնավոր։
Հետևաբար, սահմանին թեստ անելը ոչ մի երաշխիք չի տալիս, որ այդ մարդու մոտ երեք օր հետո չի գրանցվի հիվանդությունը, որը մեկի մոտ կնկատվի հազով, մյուսի մոտ՝ ջերմությամբ։ Հետևաբար, բոլոր եկողներին ուղարկում ենք ինքնամեկուսացման։ Հիմա մտածում ենք եկողներին արագ թեստերով թեստավորել, որ եթե հանկարծ որևէ արտասահմանցի վարորդի մոտ այն հաստատվի, իրեն հետ ուղարկենք, մյուսներին, ովքեր, որ ՀՀ քաղաքացի կլինեն, կտանենք, իսկական թեստ կանենք, քանի որ արագ թեստերը երբեք ճիշտ չեն եղել։ Միայն հղիության արագ թեստերն են ճիշտ։ Եվ եթե անգամ այդ վարորդների մոտ թեստի արդյունքներըը բացասական լինեն, նրանք կգնան ինքնամեկուսացման»,- շեշտեց Թորոսյանը։
Թորոսյանը տեղեկացրեց, որ երեկ 70 մեկուսացված քաղաքացու թեստավորել են, և թեստերից միայն 7-ն է դրական եղել։
Նախարարը նշեց, որ այսօրվանից ընդլայնվել են թեստ անցնողների ցանկերը, օրինակ, ընդգրկվել են վարակված լինելու մեջ կասկածվողների հետ շփված գրեթե բոլոր բուժաշխատողները, թոքաբորբ ունեցող բոլոր անձինք, կորոնավիրուսով հիվանդ և ծննդաբերող կանանց երեխաներին։
«Մի թեստավորման համար ներգրավված են լինում 5-6 հոգի, նմուշը պետք է սառցե պարկով հասցվի լաբորատորիա, էլեկտրոնային համակարգում հաշվառվի, հետո եռափուլ լաբորատոր հետազոտություն անցնի։ Եվ ամեն նմուշն առանձին չպետք է արվի։ Աշխարհում միջինում 48 ժամ է տևում նմուշ վերցնելն ու պատասխան ստանալը, մենք աշխատում ենք 24 ժամը չանցնել»,- ներկայացրեց Թորոսյանը։
Սրեգեյ Բագրատյանը խնդրեց նաև վերջնական պատասխան տալ՝ պե՞տք է կրել բժշկական դիմակներ և ձեռնոցներ։
Թորոսյանն ասաց, որ հարցը շատ կարևոր է այն համատեսքտում, որ մենք դեռ երկար պետք է ապրենք կորոնավիրուսի հետ։
«Դիմակներ և ձեռնոցներ կրելու հիմնական նպատակը որևէ տեղից բերան, քիթ կամ աչք վիրուսին չհասցնելն է։ Եթե մարդը դիմակով է, ձեռքը քթին կամ բերանին մոտեցնելուց վիրուսը չի տարածվի։ Իսկ ձեռնոցը շատ ավելի վտանգավոր է, եթե պատշաճ չի փոխվում։ Հիմա խորհուրդ է տրվում դիմակները 4 ժամից ավելի չկրել, բայց մինչև 8 ժամ թույլատրելի է։ Նույնիսկ ԱՀԿ-ն խորհուրդ է տալիս կտորից դիմակ կրել, այն ամեն օր պատշճ լվանալ և օգտագործել ։ Ցանկալի է կրել դիմակ, բայց թե այն որքանով մարդուն հեռու կպահի հիվանդությունից, կախված է միայն մարդուց։ Հիմա ձեռքերը հաճախ լվանալն ավելի կարևոր է, քան առօրյայում դիմալ կրելը»,- շեշտեց Թորոսյանը։
ԱԺ «Իմ քայլը» խմբակցության պատգամավոր Նարեկ Զեյնալյանն էլ ասաց, որ բժշկական ձեռնոցներ պետք է հագնել, օրինակ խանութում՝ զամբյուղ վերցնելիս, և խանութից դուրս գալուց հետո պետք է հանել և դեն նետել։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
