Ձեր վստահելի աղբյուրը

Հայաստանի երկրորդ նախագահ Ռոբերտ Քոչարյանի ներկայացուցիչ Հայկ Ալումյանն ասում է, որ երբ իրենք հայցադիմում են ներկայացրել վարչապետ Նիկոլ Փաշինյանի դեմ, Քոչարյանին հիվանդանոցից տեղափոխել են քրեակատարողական հիմնարկ։

Պաշտպանը «Հետք»-ի հետ զրույցում նշել է, որ մինչ իրենց ներկայացրած հայցադիմումը Նիկոլ Փաշինյանին կհասներ, արդեն խոսակցություն է տարածվել, որ, կարծես թե, Ռոբերտ Քոչարյանին ուզում են տեղափոխել։

«Ես չեմ բացառում, որ դա կապված է այն հանգամանքի հետ, որ իմացել էին, որ հայցադիմում ենք ներկայացնում։ Հայցադիմումը ներկայացրինք, հենց հասավ տեղ, նույն օրը պարոն Քոչարյանին հրատապ հիվանդանոցից քրեակատարողական հիմնարկ տեղափոխեցին»,- ասել է Հայկ Ալումյանն, ով հակված չէ հավատալ զուգադիպությունների։

«Գուցե մաքուր զուգադիպություն է, բայց ավելի քիչ հավանական է, որ դրանում զուգադիպություն լինի, քան միտում»,- կարծիք է հայտնել Հայկ Ալումյանը։

Քոչարյանը Նիկոլ Փաշինյանի դեմ դատական հայց է ներկայացրել սահմանադրական փոփոխությունների քարոզարշավի ժամանակ Փաշինյանի հրապարակային արտահայտություների համար, որոնցով, ըստ Քոչարյանի Փաշինյանն իրեն զրպարտել է։