Ձեր վստահելի աղբյուրը

«2021 թվականի հուլիսի 1-ից առողջապահության և աշխատանքի տեսչական մարմինը կիրականացնի աշխատանքային իրավունքների վերահսկման գործառույթ»,- ԱԺ առողջապահության և սոցիալական հարցերի հանձնաժողովի նիստում ասաց ՀՀ աշխատանքի և սոցիալական հարցերի նախարար Զարուհի Բաթոյանը։

Նրա խոսքով, զբաղվածության ոլորտում ծրագրերի իրականացման բարելավվմանն ուղղված ծրագրեր են իրականացվել, որպեսզի անմրցունակ քաղաքացիները ևս կարողանան զբաղվածություն ձեռք բերել։ Այդ առումով, ըստ նախարարի, փոփոխություններ են իրականացվել հաշմանդամություն ունեցող անձանց զբաղվածության ոլորտում.

«Եթե հաշմանդամություն ունեցող անձը չիրականացնի ծրագիրը, որի համար իրեն գումար է տրամադրվել, այդ գումարը հետ չի գանձվի։ Քանի որ այդ մարդիկ ավելի ռիսկային գոտում են, և կա հավանականություն, որ նրանք առողջական խնդիրների պատճառով չեն կարողանա պայմանագրով սահմանված ժամկետում այդ աշխատանքն իրականացնել։ Պայմանագիրը դադարեցնելուց հետո գործատուն հետ չի գանձի տրամադրված գումարը»։

Բաթոյանի խոսքով, 2019 թվականին արձանագրվել է 13700 աշխատանքի տեղավորման պատմություն, որից 3731-ն ապահովում է կայուն զաղվածություն, 2735-ը՝ ժամանակավոր աշխատանք, իսկ  5800-ից ավելին զբաղվածության կենտրոնների խորհրդակցական աջակցության միջոցով է իրականացվել։

Ինչ վերաբերում է կենսաթոշակային ոլորտին, ապա 2019 թվականին ավելի քան 80 հազար մարդու կենսաթոշակն ու նպաստը բարձրացել է, նվազագույն շեմ է հաստատվել 25,500 դրամը, որը 2020 թվականին ևս բարձրացել է։

Բաթոյանը տեղեկացրեց, որ Հայրենական պատերազմի 287 վետերանների պատվովճարը կրկնապատկվել է` դառնալով 100 հազար դրամ։

«2019 թվականին գրանցված է եղել 105 հազարից ավելի նպաստառու ընտանիք, որից 86700-ը ստացել է նպաստ, որի միջին չափը կազմել է 31, 350  դրամ։ Մյուս դեպքերում դրանք եղել են նաև միանվագ, եռամսյակային աջակցության տեսքով»,- տեղեկացրեց Բաթոյանը։

Նա նաև ասաց, որ մինչև 1934 թվականը ծնված 4890 ավանդատուի տրամադրվել է սոցիալական աջակցություն, իսկ 2020 թվականին այն կտրամադրվի նաև մինչև 1936 թվականը ծնվածներին։

«Կարևոր եմ համարում, որ 1031 ընտանիքի բացի սոցիալական աջակցությունից տվել ենք հնարավորություն՝ զբաղվելու գյուղատնտեսությամբ կամ անասնապահությամբ։ Այսինքն՝ նրանք այս դեպքում չեն զրկվում նպաստից»,- ասաց Բաթոյանը։

Նա նշեց, որ 2019 թվականին ավարտվել է նաև մանկատան շրջանավարտների բնակարանային ապահովմանն ուղղված գնման վկայագրերի կնքման գործընթացը, որը  կտևի մինչև 2020 թվականի դեկտեմբերի 30-ը. «Մանկատան 300 շրջանավարտի համար բնակարան ձեռք կբերվի։ Նրանց նկատմամբ պետությունը պարտավորություն ուներ դեռ 2003 թվականից»։

Նախարարը շեշտեց, որ սեզոնային 20 աշխատանքների դեպքում քաղաքացին չի զրկվի նպաստ ստանալու հնարավորությունից։ Այդ աշխատանքները հիմնականում վերաբերում են գյուղատնտեսությանը, անասնապահությանը, շինարարական աշխատանքներին, ճանապարհաշինությանը և այլն։

Ըստ Բաթոյանի, նախորդ տարի խնամքի հաստատություններում շուրջ 6500 տարեց քաղաքացի է ընդգրկվել, և այստեղ խոսքը ոչ միայն շուրջօրյա, այլ նաև ցերեկային կամ տանը իրականացվող խնամքի մասին է։

Ինչ վերաբերում է մանկատներին և գիշերօթիկ հաստատություններին, ապա ըստ նախարարի, 2020-23 թթ. ծրագրով նախատեսվում է բոլոր երեխաներին ընձեռել ընտանիքում ապրելու հնարավորություն․

«Այստեղ կարևորում ենք երեխայի՝ կենսաբանական ընտանիքում ապրելը։ Մենք զարգացնում ենք խնամատարության ինստիտուտը, այս պահին 65 երեխա գտնվում է 49 խնամատար ընտանիքում։ Այդ ընտանիքները միջինը 136 հազար դրամ գումար են ստանում և հավելյալ 30 %, եթե խոսքը հաշմանդամություն ունեցող երեխայի մասին է։ Գիշերօթիկ հաստատություններից 230 երեխա վերադարձել է ընտանիք և կրկին ընդգրկվել ցերեկային ծառայություններում»։

ԱԺ «Իմ քայլը» խմբակցության պատգամավոր Նարեկ Զեյնալյանը հավելեց, որ 2019 թվականին 2018-ի նկատմամբ 52%-ով նվազել է ծայրահեղ աղքատության ցուցանիշը, և մոտ 10%-ով նվազել է աղքատության ցուցանիշը։

Պատգամավորը նաև հույս հայտնեց՝ մոնիթորինգ կարվի և կգնահատվի, թե որքանով է փոխվել գիշերօթիկ հաստատություններից ընտանիք վերադարձած երեխաների կյանքի որակը։

ԱԺ «Բարգավաճ Հայաստան» խմբակցության պատգամավոր Սերգեյ Բագրատյանն էլ հետաքրքրվեց՝ քանի մանկատան սան է դուրս մնացել բնակարան ստանալու ծրագրից, և արդյո՞ք նշված 300 սաներն արդեն ստացել են իրենց բնակարանները։

Պատասխանելով հարցին՝ Բաթոյանը նշեց, որ մանկատան սաների համար բնակարան ձեռք բերելու որոշումն ընդունվել է 2019 թվականի տարեվերջին, դա չնախատեսված ծրագիր է եղել՝ խնայված միջոցների հաշվին։

«Շահառուներն այն քաղաքացիներն են, ովքեր 2003 թվականից հետո են դուրս եկել մանկատնից։  300 շահառուները ներառյալ 2019 թվականի մանկատան շրջանավարտներ են։ Այս պահին արդեն գնման վկայագրեր են տրամադրվել 133 մարդու, և յուրաքանչյուրի գումարի չափը 6.3 մլն դրամ է, և եթե օրինակ, մարդը կարող է իր համար ավելի նվազ գնով գումար ձեռք բերել, մնացյալ գումարն իրեն է մնում։ Մենք բացահայտել և ցուցակագրել ենք մի խումբ անձանց, ովքեր 2003-ից շուտ են դուրս եկել մանկատնից, և պետք է լուծենք նաև նրանց բնակարանի հարցերը»,- տեղեկացրեց Բաթոյանը։