Ձեր վստահելի աղբյուրը

Մարտունի ԲԿ-ի երկու բուժաշխատողների մոտ կորոնավիրուսի թեստի արդյունքները բացասական են եղել, իր ֆեյսբուքյան էջում հայտնել է Գեղարքունիքի մարզպետ Գնել Սանոսյանը։

Բժիշկները անմիջական շփում էին ունեցել կորոնավիրուսով վարակված հիվանդի հետ, ով 8 օր բուժվել էր Մարտունու հիվանդանոցում։

Երեկ հայտնի դարձավ, որ Գեղարքունիքի մարզի Մարտունու տարածաշրջանում հաստատվել է COVID-19-ի առաջին դեպքը։ Վարակվածը Աստղաձոր համայնքի բնակչուհի է։

Մարտունու բժշկական կենտրոնի ղեկավար Անդրանիկ Հարությունյանը Panorama.am-ի հետ զրույցում հայտնեց, որ կինը հիվանդանոցում բուժում է ստացել 8 օր, ապա տեղափոխվել է «Նորքի» ինֆեկցիոն հիվանդանոց, որտեղ և նրա մոտ հաստատվել է կորոնավիրուս։

«Անամեզով հիվանդի վիճակը թույլ չի տվել, որ իրեն տեղափոխենք Երևան, վիճակը դեպի կայունացում է գնացել։ Հիվանդանոց գալու օրը ջերմություն է ունեցել, իսկ երեկոյան իջել է։ Չորս օրում հիվանդի վիճակը դեպի լավն է գնացել, և կասկած չի եղել, որ իրեն տեղափոխենք, կամ այլ անալիզներ հանձնելու ուղարկենք»,- ասաց Հարությունյանը։

Մեր հարցին՝ արդյոնք հիվանդանոցն ունի պայմաններ՝ կորոնավիրուսով վարակված քաղաքացիներին սպասարկելու, Հարությունյանը պատասխանեց, որ նախնական ամեն ինչով հիվանդանոցն ապահովված է, և նախարարության կողմից անընդհատ վերահսկողություն է իրականացվում։

Մարզպետարանից էլ մեզ հայտնեցին, որ հիվանդին բուժման 8-րդ օրվա ընթացքում են ուղարկել կորոնավիրուսի համար թեստավորման, քանի որ բուժման առաջին 5 օրերին նա բուժվել է երիկամների համար, իսկ 5-րդ օրվա ընթացքում նրա մոտ նկատվել է թոքաբորբ։

«Թոքաբորբի հայտնաբերումից երեք օր հետո հիվանդին տարել են Նորքի ինֆեկցիոն, որտեղ և հաստատվել է դեպքը»,- ասացին մարզպետարանից։

Տեղեկացնենք նաև, որ հիվանդին բուժող և արդեն թեստավորված երկու բուժաշխատողներից բացի, այժմ 6 բուժաշխատող մեկուսացված է, նրանք անմիջական շփում են ունեցել հիվանդին բուժող բժշկի հետ։