Ձեր վստահելի աղբյուրը

Ռիո դե Ժանեյրո քաղաքում՝ Կորկովադու լեռան գագաթին Հիսուս Ամենափրկիչ արձանին Զատկի տոնին «հագցրել» էին  բժշկական հագուստ՝  ի նշան համերաշխության բժիշկների, որոնք ներկա պահին կորոնավիրուսի  դեմ հերոսական պայքար են մղում։ Նման կերպ ակցիայի կազմակերպիչները շնորհակալություն են հայտել ողջ աշխարհի բժիշկներին։

News.ru-ի հաղորդմամբ, Globo հեռուստաալիքի տվյալներով, արձանն իր նոր տեսքը ստացել է ի շնորհիվ լուսավորության։ Հուշարձանի  վրա տարբեր լեզուներով  հայտնվել է «շնորհակալություն» բառը։ Բացի այդ, հուշարձանի վրա հայտնվել են կորոնավիրուսից առավել տուժած երկրների՝ ԱՄՆ, Իսպանիա, Իտալիա, Չինաստան, նաև Բրազիլիա,  ազգային դրոշների գույները։

Բրազիլիայում կորոնավիրուսից մահացել է 1220 մարդ, երկրում ավելի քան 22 հազար 160 վարակման դեպք կա։ Բրազիլիայում 97-ամյա կինը, որը եղել է պացիենտներից ամենատարեցը, բուժվել է։ Նա հոսպիտալացվել էր վարակի ախտանիշներով ապրիլի 1-ին, քչերը կարող էին կարծել, որ  նա կհաղթի COVID-19-ին։ Չնայած դրան, ապրիլի 12-ին բրազիլուհին դուրս է գրվել հիվանդանոցից։ Բժիշկների և բուժքույրերի ծափահարությունների ներքո նրան դուրս են հանել հիվանդանոցից հաշմանդամի սայլակով։