Ձեր վստահելի աղբյուրը

Կորոնավիրուսի հետևանքների չեզոքացմանն ուղղված չորրորդ ծրագիրը, որը վերաբերում է մինչև 14 տարեկան երեխա ունեցող և աշխատանքից ազատված անձանց, փոխհատուցման չափը 100 հազար դրամ է, ընթացքի մեջ է։ Լրագրողների հետ հանդիպմանը հայտարարեց աշխատանքի և սոցիալական հարցերի նախարար Զարուհի Բաթոյանը և հիշեցրեց, որ ծրագրի շրջանակում աջակցություն ստանալու համար դիմելու անհրաժեշտություն չկա։

Հիշեցնենք, որ  չորրորդ ծրագրի շահառու՝ մինչև 14 տարեկան երեխա ունեցող ընտանիքը, որտեղ ծնողները կամ ծնողներից մեկը կորցրել է իր գրանցված աշխատանքը մարտի 13-25 ընկած ժամանակահատվածում և մարտի 25-ի դրությամբ ծնողներից ոչ մեկը չունի աշխատանք,
• օժանդակության ձևը՝ միանվագ մեկանգամյա աջակցություն յուրաքանչյուր անչափահաս երեխայի համար 100.000 դրամի չափով,
• հիմնական պայմաններ՝ աշխատանքից ազատվելուն նախորդող 2 ամիսների ընթացքում միջին ամսական աշխատավարձի չափը չի գերազանցել է 500.000 դրամը:

Դիմելու կարիք չկա, համակարգն ինքնուրույն է որոշում շահառուներին և փոխանցում գումարը:

«Այս միջոցառման ցանկը թարմացվում է։ Պետք է փաստաթղթով ներկայանալ բանկեր»,- ասաց նախարարը։

Խոսելով վեցերորդ միջոցառման մասին՝ Զ. Բաթոյանն ասաց, փոխանցումները իրականացված են, 6723 շահառու ունի այս ծրագիրը։

Հիշեցնենք, որ վեցերորդ միջոցառման  շահառու են մարտի 13-30 ընկած ժամանակահատվածում աշխատանքից ազատված անձը
• օժանդակության ձևը՝ միանվագ մեկանգամյա աջակցություն 68.000 դրամի չափով,
• հիմնական պայմաններ՝
- հունվարի 1-ից մարտի 13-ը ունեցել է գրանցված աշխատանք
- աշխատանքից ազատվելուն նախորդող 2 ամիսների ընթացքում միջին ամսական աշխատավարձի չափը չի գերազանցել է 500.000 դրամը
- չի աշխատել ֆինանսական կազմակերպություններում կամ շահումով խաղերի կազմակերպիչների մոտ
Դիմելու կարիք չկա, համակարգը ինքնուրույն է որոշում շահառուներին և փոխանցում գումարը:

Յոթերորդ միջոցառման շահառու հղի կանանց ցանկը ընդլայնվել է։

«Շահառու կհանդիսանան նաև այն հղի կանայք, որոնց ամուսինները մարտի 30-ի դրությամբ ընդհանրապես չեն աշխատել։ Այս ծրագրի շահառու այս պահին հանդիսանում են 5957 քաղաքացիներ, բայց փոփոխությունից հետո ցանկը թարմացվում է»,- ասաց նախարարը։

Հիշեցնենք, որ ավելի վաղ հայտարարվել էր, այս ծրագրի շահառու է հղի կինը, ով մարտի 30-ի դրությամբ չունի աշխատանք և ում ամուսինն ազատվել է աշխատանքից մարտի 13-30 ընկած ժամանակահատվածում կամ չունի ամուսին,
• օժանդակության ձևը՝ միանվագ մեկանգամյա աջակցություն 100.000 դրամի չափով,
Դիմելու վայրը՝ դիմելու կարիք չկա, համակարգը ինքնուրույն է որոշում շահառուներին և փոխանցում գումարը:

Զարուհի Բաթոյանը տեղեկացրեց՝ ութերորդ ծրագիրը մեկնարկել է երեկ, մի քանի ժամում ստացել են  45 հազար դիմում ֆիզիկական անձանցից, որոնցից 27 հազարը հաստատվել է, նրանք արդեն այսօր բանկերի կամ անձնական հաշիվների միջոցով կկարողանան գումարը ստանալ։

Հիշեցնենք, որ ութերորդ միջոցառման  շահառու են այն անձինք, ովքեր մարտի 13-30 հանդիսացել են նշված ոլորտների վարձու աշխատողներ կամ անհատ ձեռնարկատերեր՝
- հյուրանոցային և հյուրատնային ծառայություններ,
- հանրային սննդի ծառայություններ,
- զբոսաշրջային ծառայություններ,
- վարսավիրանոցների և գեղեցկության սրահների ծառայություններ,
- մանրածախ առևտրի ծառայություններ (բացառությամբ սննդամթերք և դեղորայք վաճառողների)

• օժանդակության ձևը՝ միանվագ մեկանգամյա աջակցություն.
- վարձու աշխատողի հունվար և փետրվար ամիսների միջին աշխատավարձի 50%-ի չափով, բայց ոչ ավել քան 136.000 դրամը, եթե աշխատողը աշխատել է լրիվ դրույքով՝ ապա ոչ պակաս քան 68.000 դրամը,
- Անհատ ձեռներեցներին՝ 2019 թվականի 4-րդ եռամսյակի իրացման շրջանառության 10 %-ի չափով, բայց ոչ ավել, քան 136.000 դրամը,
• հիմնական պայմաններ՝ աշխատանքից ազատվելուն նախորդող 2 ամիսների ընթացքում միջին ամսական աշխատավարձի չափը չի գերազանցել է 500.000 դրամը:
Դիմելու վայրը՝ online.ssa.am կայքէջ:

Նախարարը տեղեկացրեց, որ երեկ մեկնարկել է նաև իններորդ միջոցառման դիմումների ընդունումը։

«Այս ծրագրի շահառուների ցանկը դեռևս կազմման ընթացքում է։ Համակարգը այս պահին ժամանակավոր դադարեցրել ենք, քանի որ դիմուների հոսքը շատ մեծ էր։ Սխալներ թույլ չտալու համար այս պահին մի քանի ժամով դադարեցրել ենք, հետո օրվա ընթացքում կվերսկսենք»,- ասաց նա՝ հիշեցնելով, որ 8-րդ և 9-րդ միջոցառումների շահառու դառնալու համար դիմում գրելու անհրաժեշտություն կա։

Հիշեցնենք, որ իններորդ միջոցառման շահառու են  0-18 տարեկան երեխա ունեցող ընտանիքը, որտեղ երկու ծնողներն էլ չունեն գրանցված աշխատանք,
• օժանդակության ձևը՝ միանվագ մեկանգամյա աջակցություն յուրաքանչյուր երեխայի համար 26.500 դրամի չափով,
• հիմնական պայմաններ՝ երեխաները և ծնողներից առնվազն մեկը բնակվում են ՀՀ-ում, չեն հանդիսանում ընտանեկան նպաստ ստացող, եթե մինչև մարտի 1-ը ունեցել են աշխատանք, ապա աշխատավարձի չափը չի գերազանցել է 500.000 դրամը:

Դիմելու վայրը՝ online.ssa.am կայքէջ: