Ձեր վստահելի աղբյուրը

«Կարծում եմ՝ մենք բոլորս պարտավոր ենք, հաշվի առնելով այս գործընթացի յուրահատկությունը, ստեղծելով բարենպաստ պայմաններ, որպեսզի այս գործը ստանա իր տրամաբանական գնահատականը»,- քվեարկությունը կատարելուց հետո լրագրողների հետ զրույցում ասաց Արցախի նախագահ Բակո Սահակյանը՝ պատասխանելով ՀՀ երկրորդ նախագահ Ռոբերտ Քոչարյանի կալանավորման վերաբերյալ հարցին։

Արցախի նախագահի խոսքով, ավելի քան համոզված է, որ այդպիսի նախադրյալներ ունեն։

«Մեր ողջամտությունից, գիտակցությունից, պատասխանատվությունի է նաև կախված լինելու, թե ինչպիսի ավարտ կունենա այս գործընթացը»,- նշեց Բակո Սահակյանը՝ հավելելով, որ նախորդ հանդիպումների ժամանակներ այս գործընթացի հետ կապված ներկայացրել է իր տեսակետները։

Հարցին, արդյո՞ք Ռ.Քոչարյանի կալանավորումը կարող է ազդեցություն ունենալ հայ-ռուսական հարաբերությունների վրա, Բակո Սահակյանը պատասխանեց. «Հայ-ռուսական բարեկամությունը դաշնակցային, ինչու չէ նաև եղբայրական բարեկամություն է, որի հիմքը դրվել է դարեր առաջ։ Ավելի քան համոզված եմ, որ բարեկամությունը շարունակական է լինելու այս շրջանում հատկապես, երբ աշխարհը, այդ թվում Ռուսաստանն ու մեր հայրենիքը հայտված են ոչ հասարակ պայմաններում։

Կարծում եմ՝ մեր բարեկամության նշանակությունը հաշվի առնելով՝ մեր պատասխանատուները կանեն ամեն ինչ, որպեսզի այդ բարեկամությունն ապագայում էլ ավելի խորանա ու ստանա ներկայիս ժամանակին համապատասխան արդյունավետություն։ Համոզված եմ, որ այդպես է լինելու, մեր  բարեկամությունը շարունակվելու է, ամրապնդվելու է, ներկայիս մարտահրավերներն էլ այդ բարեկամությամբ հաղթահարվելու են»։