Ձեր վստահելի աղբյուրը

ՀՀ երկրորդ նախագահի գրասենյակի ղեկավար Վիկտոր Սողոմոնյանը համոզված է՝ իշխանության նպատակն է ամեն գնով Ռոբերտ Քոչարյանին հնարավորինս երկար կալանքի տակ պահել։

«Այդ նպատակի իրականացման համար նրանք նույնիսկ նման լկտի գործողությունների են գնում, սա արդեն ամոթալի գործողություններ են, որոնք ոչ մարդուն, ոչ քաղաքականությանը հարիր չեն»,- «5-րդ ալիք» ՀԸ Ագնեսա Խամոյանի հեղինակային «Հարցազրույց» հաղորդաշարի ընթացքում ասաց ՀՀ 2-րդ նախագահի գրասենյակի ղեկավար Վիկտոր Սողոմոնյանը։

Նա հիշեցրեց, որ աշխարհում կորոնավիրուսի համավարակի պայմաններում բազմաթիվ միջազգային կազմերպություններ՝ այդ թվում ՄԱԿ-ի, ԵԱՀԿ-ի ներկայացուցիչները, իրավապաշտպաններ ու բժիշկներ խոսում են այն մասին, որ 60 տարեկանից բարձր անձինք գտնվում են ռիսկի գոտում։

«Գիտեք, որ Ռոբերտ Քոչարյանը որոշակի խնդիրներ է ունեցել՝ կապված առողջության հետ, հիվանդանոց էր տեղափոխվել։ Ինձ ասացին, որ առանց խնդիրները հաղթահարելու որոշել են նրան տեղափոխել քրեակատորողական հիմնարկ։ Տեղեկություններ ունեմ, փորձում եմ ճշտել, որ քրեակատորաղական հիմնարկներում, այդ թվում այն հիմնարկում, որտեղ հիմա գտնվում է նախագահ Քոչարյանը, հիվանդության ռիսկեր, այնուամենայնիվ, կան։ Գիտեք, կալանքն ապօրինի է, հիմա էլ դրան գումարվում է նիստ չանցկացնելու համառությունը, ակնհայտ է, որ այն ձգձգվում է արհեստականորեն, ինչպես եղել է անցած տարվա դեկտեմբերին, երբ դատավորը որոշեց գնալ արձակուրդ։ Ստացվում է, որ մենք մի իրավիճակում ենք, որբ նախագահին ուղղակի վտանգ է սպառնում»,- ասել է Վիկտոր Սողոմոնյանը։

Նա նկատեց՝ բացի այն, որ կալանքն ապօրինի է, հիմքեր չկան, Ռոբերտ Քոչարյանը որևէ կերպ չի խոչընդոտելու գործի քննությանը, խոչընդոտելու որևէ բան էլ չկա, քանի որ վկաներից որևէ մեկը նրա դեմ ցուցմունք չի տվել, բացի այդ, որպես նախկին նախագահ, նա օգտվում է պետական պահպանության ծառայությունից, նրան շրջապատում են ԱԱԾ սպաներ, այդ իրավիճակում խոսել ինչ-որ գաղտնի գործողությունների մասին, աբսուրդ է։

«Գործը վաղուց գոյություն չունի։ Վկաներից ոչ մեկ ցուցմունք չի տվել։  Մի արհեստական գործ է, որը ստեղծվել է կարկառուն ՀՀՇ-ականների իղձերի ու երազանքների, ելույթների հիման վրա, որի կենտրոնում մի բան է, որ տանկերը եղել են Երևանի փողոցներում։ Իսկ դուք նայե՞լ եք վերջին երկու տարիների միջազգային քրոնիկոնը, տանկեր եղել են եվրոպական շատ երկրների մայրաքաղաքների փողոցներում»,- ասաց նա։

Սողոմոնյանը մեկ անգամ ևս ընդգծեց, եթե ապօրինի կլանավորված մարդու կյանքին վտանգ է  սպառնում, և այդ պայմաններում քաղաքական գործիչները, իրավապաշտպանները լռում են, ապա պետք է հասկանան, որ իրենք էլ դառնում են մեղսակից, դրանից բխող հետևանքներով։

«Ստեղծված իրավիճակում բոլոր օրինական, քաղաքական միջոցները ձեռնարկելու ենք։ Ակտիվ, փողոցային գործողությունների մենք ցավոք չենք կարող դիմել, մենք ունենք մեր աջակիցների կոչերը դրանց մասին, բայց այս պահին որևէ մեկին թույլ չենք տա դուրս գալ փողոց ու ակցիաներ կազմակերպել։ Ես կարծում եմ, որ հասել ենք մի հանգրվանի, որտեղ լակմուսի թղթի էֆեկտն աշխատելու է միանշանակ»,-ասաց նա։