Ձեր վստահելի աղբյուրը

Արցախի նախագահ Բակո Սահակյանը պատրաստ է ցանկացած պարագայում  նպաստելու 2016թ. ապրիլին ծավալված ռազմական գործողությունների հանգամանքները ուսումնասիրելու նպատակով ստեղծված հատուկ քննիչ հանձնաժողովի աշխատանքներին։ Լրագրողների հետ զրույցում ասաց Բակո Սահակյանը։

Նա նշեց, որ հանձնաժողովի աշխատանքներին մասնակցելու հրավեր իրեն չի ուղղվել։

«Բայց ցանկացած պարագայում և ես, և մենք բոլորս պատրաստակամ ենք նպասելու այդ հանձնաժողովի աշխատանքները տրամաբանական ավարտին հասցնելուն։ Հատկապես, որ այդ հանձնաժողովի անդամներն ու  պատասխանատուները հայտարարել են, որ  նրանց նպատակը մեկն է՝ վեր հանելու այդ ժամանակաշրջանի բացերը, ամեն կերպ նպաստելու, որ հետագայում նման զարգացումներ, գործողություններ ունենալու դեպքում այդ  բացերը չունենանք։

Սերժ Սարգսյանը տվել է իր համաձայնությունը՝ ներկայանալու հանձնաժողով և նրանց հետաքրքրող հարցերին պատասխանելու, ինչը ողջունելի է»,- ասաց Արցախի նախագահը։

Ինչ վերաբերում է ՀՀ առաջին նախագահ Լևոն Տեր-Պետրոսյանի հոդվածին, Բ.Սակայնանն ասաց. «Այո, ծանոթ եմ, որևէ արտառոց բան չեմ տեսնում։ Սա առաջին դեպքը չէ, որ Հայաստանի առաջին նախագահը, երբ անհրաժեշտություն է լինում, նա իր տեսակետն հայտնում է։

Շատ բնական եմ համարում, որ նման իրավիճակներում մեր երկրի նախորդ պատասխանատուներն  իրենց տեսակետը հայտնում են։ Տեղյակ եմ տարբեր մեկնաբանությունների մասին, ես այդպես չեմ մտածում, մտածում եմ, որ Հայաստանի նախագահն իր պատասխանատվությունն է ցուցաբերել, ցանկություն է հայտնել օգտակար լինելու նաև այս շրջանում»։