Ձեր վստահելի աղբյուրը

Օնլայն հարթակի միջոցով այսօր հարցեր ուղղվեցին Քաղաքացիական ավիացիայի կոմիտեի նախագահ Տաթևիկ Ռևազյանին և նրա տեղակալ Գալուստ Պողոսյանին։

Հարց. «Ինչպե՞ս եղավ, որ Եվրոպական թռիչքային անվտանգության գործակալությունն այցելեց Հայաստան»:

Տ. Ռևազյան. «Երբ մեր ավիաընկերությունները դիմեցին, որ թռիչքի թույլտվություն ստանան դեպի Եվրոպա, ոչ բոլորն էին պատրաստ այդ քայլին, այնտեղ հայտնաբերել են այդ թերությունները: Ես ուզում եմ, որ բոլորիս համար պարզ լինի՝ մենք ընդունում ենք, որ դա Քաղաքացիական ավիացիայի կոմիտեի հիմնական թերությունն է, որովհետև,  եթե մենք տեսչական ստուգումների ընթացքում նկատեինք, արձանագրեինք, որ այդ ավիաընկերությունը խնդիր ունի և կասեցնեինք այն, ապա ինքը չէր էլ կարողանա դիմել: Սա է կոմիտեի գործառույթը, այն շատ կարևոր է, քանի որ մենք վերահսկող մարմին ենք: Մենք պետք է առաջինը նկատեինք, որ ավիաընկերությունը խնդիր ունի: Ճիշտ չէ, որ  ավիաընկերությունը դիմի Եվրոպա, որից հետո նոր մենք հասկանաք, որ խնդիր ունենք: Երբ հասկացա, որ դա է խնդիրը եղել, ես անձամբ խնդրեցի, որ վերահսկողական մարմինը գա և ստուգի մեր բոլոր գործընթացները»:

Հարց. «Ի՞նչ խախտումներ է արձանագրել Եվրոպական թռիչքային անվտանգության գործակալությունը և ինչի՞ համար»:

Գ. Պողոսյան. «Եղել են 42 դիտողություններ: Սրանք ես չեմ կարող անվանել թերություններ, որովհետև գործակալության այցը եղել է զուտ գնահատման, ոչ թե աուդիտի: 42 դիտողություններից 18-ին պատասխանել ենք: Պատասխանել ենք բոլորին, բայց կան կրկնություններ: Եվրոպական թռիչքային անվտանգության գործակալությունը եկել էր կոնկրետ խնդիրը գտնելու և նա գտել է»:

Հարց. «Արդյո՞ք Եվրոպական թռիչքային անվտանգության գործակալության եզրակացությունը բողոքարկվելու է և ի՞նչ բանակցություններ են տարվում»:

Տ. Ռևազյան. «Իրականում այս փաստաթուղթը վերջնական չէ: Պայմանավորվածությունն այն է, որ փետրվարյան այցից հետո նրանք ուղարկելու են զեկույցը մեզ: Հետո մեզ ժամանակ են տրամադրել, որ մենք մեր դիտողություններն անենք: Դրանք արել ենք և ապրիլի 6-ին ուղարկել այդ թիմին, որը եկել էր Հայաստան: Նրանք կնայեն մեր դիտողությունները և կհասկանան, թե ինչը հաշվի կառնեն և ինչը ոչ և այդ ամենը կներկայացվի Եվրոպայի անդամ պետություններին, որովհետև վերջնական որոշում կայացնողը նրանք են: Այդ որոշումը կայացվելու է մայիս ամսին: Քաղաքացիական ավիացիայի կոմիտեի հետ կապված վերջնական փաստաթուղթ  և գնահատական չկա: Մենք շատ դիտողություններ ունեինք, օրինակ, 42 դիտողություններից 18-ը մենք ջնջել ենք և բացատրել, թե ինչու: Ուղարկել ենք իրենց և սպասում ենք արձագանքին: Մենք ուրախ ենք, որ այս ամենը իմացել ենք: Ավիացիայում ամենավատ դեպքը՝ վթարն է և լավ է, որ մենք հասկացել ենք խնդիրները և չի հասել նրան, որ լուրջ հետևանքներ ունեցող իրավիճակներ լինեն: Շատ լավ է, որ դիմել ենք, իմացել ենք և շատ լավ է այս ամեն ինչը, իհարկե՝ թռիչքային անվտանգության տեսանկյուննից:

Հարց.« Ա1+-ը պահանջել էր ներկայացնել զեկույցը և կոմիտեի նախագահի տեղակալ Գալուստ Պողոսյանը մերժել է՝ պատասխանելով որ հրապարակման ենթակա չէ: Այն դեպքում, երբ զեկույցը գաղտնի գրիֆի տակ չէ: Ինչո՞ւ»:

Գ. Պողոսյան. «Պարզաբանեմ, որ սա զեկույցի  նախնական տարբերակն է: Այն բաղկացած է 4 մասից: Առաջին մասը ընդհանուր ներկայացումն է, երկրորդ մասը վերաբերում է միայն կոմիտեի դիտարկումներին, երրորդ մասը մի ավիաընկերությանը և չորրոդը՝ մյուս ավիաընկերությանը:Առաջին մասում արձանագրված է, որ եվրոպական գործակալությունն ավիաընկերություններին է տրամադրում առաջին մասը և իրենց վերաբերող մասը և չի տրամադրում Քաղաքացիական ավիացիայի կոմիտեի և մյուս ավիաընկերությունների մասը, ինչը նշանակում է, որ այն հրապարակման ենթակա չէ: Հայտարարում են, որ գործակալությունը ստուգել է բոլոր ոլորտները և բոլորով թերություններ հայտնաբերել: Իրականում այդպես չէ, դիտակվել է միայն ավիաընկերությունների հետ համագործակցության հարցերը: Հայտարարում եմ, որ օդանավակայանը իրականացնում է բարձր մակարդակով իր գործառույթը թռիչքների անվտանգության ապահովման առումով և կոմիտեն հետևում է դրան»:

Տ. Ռևազյան. «Այստեղ թաքցնելու հարց չկա: Կան տեխնիկական խնդիրներ: Մենք գիտենք, որ լուրջ խնդիրներ ունենք և դրանք պետք է լուծվեն:  Փաստաթղթում որևէ անձնավորված բան չկա՝ վերջին 2 տարում է, թե 5 կամ 10 տարի առաջ են այդ թերությունները եղել: Կարևոր է, որ այդ փաստաթուղթը սխալ ձեռքերում չընկնի: Եթե մենք հրապարակենք այդ փաստաթուղթը, դա  կարող է ոչ բարեկամ պետությունների ձեռքն ընկնի: Ես գնահատականներ չեմ կարող տալ, թե այդ դեպքում դա ինչ հետևանքներ կարող է ունենալ»: