![](https://panorama.am/news_images/759/2274789_1/ancanc_407.thumb.jpg)
Վարչապետը կանխատեսում է, որ սեպտեմբերին համաճարակը կարող է վերսկսվել
Էդմոն Մարուքյանը ԱԺ-ում հարց ուղղեց կառավարությանը.
«Կառավարությունը որոշել է ապրիլի 20-ից տեքստիլ արտադրությունը բացել: Օրինակ՝ Վանաձորի տեքստիլը բացվում է, և մեկ էլ, մի քանի օր հետո, այնտեղ վարակված մարդ է հայտնաբերվում: Ի՞նչ եք անելու՝ նորից այդ երեք հազար աշխատողին ուղարկում ենք տուն, թե վարակվածին բուժենք, իսկ մյուսներն աշխատեն: Որովհետև մարդիկ մտահոգված են: Երկրորդ հարցը՝ գյուղեր ունենք, որ արտագնա աշխատանքի են գնացել ամբողջությամբ, հիմա ամբողջ գյուղով նստած են տանը: Արտագնա աշխատանքով ապրող, Հայաստանին գումարներ ուղարկող, Հայաստանի տնտեսությունը սնուցող մարդկանց ի՞նչ աջակցություն է ցուցաբերվելու: Ժամանակն է եկել, որ որպես պետություն իրանց կողքին կանգնենք»:
Վարչապետ Նիկոլ Փաշինյանը խնդրեց պայմանավորվել, որ պատգամավորները մեկ հարց տան: «Երկու հարց ուղղեցիք, երկուսն էլ շատ կարևոր են, եթե փորձեմ պատասխանել, երկուսին էլ՝ կիսատ եմ պատասխանելու»,- հայտարարեց Նիկոլ Փաշինյանը և պատասխանեց միայն առաջին հարցին:
«Ունենք արտադրական ձեռնարկություններ, որոնք իրենց կարգավորումների բերումով այս ընթացքում աշխատել են: Ընդորում, իրենց աշխատակիցների շրջանում գրանցվել է կորոնավիրուսի դեպք, բայց այդ դեպքը մուտք չի գործել արտադրական տարածքներ: Ունենք հակառակ օրինակը, մենք այսօր կորոնավիրուսով վարակվածների այսքան մեծ թիվ ունենք հիմնականում երեք ճյուղի պատճառով, որոնցից երկուսն արտադրական ձեռնարկություններ են: Եթե այդ արտադրական ձեռնարկությունները չլինեին, այդ վարակի թիվը կիսով չափ քիչ կլիներ»:
Վարչապետը հայտարարեց, որ ուզում են հաջողված ձեռնարկությունների փորձը կիսել մյուսների հետ, բայց խնդիր կա, որ այդ ընկերությունները չեն ուզում իրենց անունը հնչի:
«Մենք հաջողված փորձի տեսանյութ ենք պատրաստել, որ փոխանցենք այդ ընկերություններին: Եթե ոչ 100 տոկոսով, ապա 90 տոկոսով վիրուսը չի մտնի արտադրական տարածք»,- հավելեց վարչապետը:
Ըստ Նիկոլ Փաշինյանի, կառավարության ռազմավարությունն այն է, որ կորոնավիրուսի ժամանակ կարողանանք ապրել և ապրիլի 20-ից տեքստիլ ոլորտը պետք է վերաբացվի:
Անդրադառնալով վարակի տարածման զարգացումներին՝ Նիկոլ Փաշինյանը հայտնեց. «Հնարավոր է, որ շոգերը սկսվեն և մենք ստանանք համաճարակի միջանցք մինչև սեպտեմբեր և հոկտեմբերից մենք սկսենք այդ ամեն ինչը զրոյից: Մենք պետք է պատրաստված լինենք դրան»:
Լրահոս
Տեսանյութեր
![Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան](https://panorama.am/video_images/17/50811_1/mela_6760_thumb_v1_thumb_v1_thumb.thumb.jpg)
Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան